BQO-da joldy kútip ustamaǵan kásiporynǵa 73 mln teńge aıyppul salyndy
ORAL. QazAqparat – Batys Qazaqstan oblysynda joldy ýaqtyly kútip ustamaǵan «Qazavtojol» JShS BQO fılıalyna 74 mln-ǵa jýyq teńge aıyppul salyndy, dep habarlaıdy QazAqparat tilshisi.
«QazAvtoJol» UK» AQ BQO fılıalynyń ókilderi atalǵan kásiporynǵa qańtar aıynyń jumys nátıjeleri boıynsha osyndaı shara qabyldady.
«QazAvtoJol» UK» AQ BQO fılıalynyń dırektory mindetin atqarýshy Eldar Sadyqtyń aıtýynsha, óńirde respýblıkalyq mańyzy bar joldyń uzyndyǵy 1414 shaqyrym bolsa, sonyń 238 shaqyrymy kúrdeli jóndelýde. Al 1176 shaqyrym jolǵa «Qazavtojol» JShS BQO fılıaly kútip ustaý jumystaryn júrgizýge tıisti. Osy jolǵa 78 tehnıka qyzmet kórsetetin bolsa, sonyń ishinde qysqy kútimge 49 tehnıka qarastyrylǵan.
Aýa raıynyń qolaısyzdyǵyna baılanysty qosymsha qajettilik úshin 9 arnaıy tehnıkaǵa kelisimshart jasaldy.
«Bıylǵy 14 aqpanda oblysta aýa raıynyń kúrt ózgerip, burqasyn kóterilýi saldarynan respýblıkalyq joldarda kóktaıǵaq qalyptasty. Osy derek úshin merdiger uıymǵa uıǵarym berildi, sonyń negizinde aqpan aıynyń qorytyndysy boıynsha sharalar qabyldanatyn bolady», dedi Eldar Ersaıynuly.
Eske sala keteıik, budan buryn Batys Qazaqstanda boranǵa baılanysty joldar jabylǵanyn jazǵan bolatynbyz.
