BQO-da joldy kútip ustamaǵan merdiger mekemege aıyppul salyndy
ORAL. KAZINFORM — Batys Qazaqstan oblysynda avtomobıl joldarynyń jalpy uzyndyǵy 6 183 shaqyrym bolsa, sonyń 1 349-y – respýblıkalyq, 4 834-i – jergilikti mańyzy bar joldar.
BQO jolaýshylar kóligi jáne avtomobıl joldary basqarmasynan málim etkenindeı, jergilikti mańyzy bar joldardy kútip ustaýǵa barynsha mán beriledi.
Sonymen qatar óz mindettemelerin oryndamaǵan merdiger mekemelerge tıisti shara qoldanylady.
2025 jyly Algaı-Jalpaqtal-Juldyz-Qarasý (6-170 km) avtojolyn kútip ustaý jáne aǵymdaǵy jóndeýdi mindetine alǵan «SSS STORY GROUP» JShS-ǵa 405 myń 692,64 teńge kóleminde aıyppul salyndy. Turaqsyzdyq aıyby tolyqtaı tólendi.
Basqarma málimetine qaraǵanda, qazirgi ýaqytta jergilikti mańyzy bar avtomobıl joldaryn kútip ustaýǵa 265 arnaıy tehnıka jumyldyrylǵan. Qysqy kezeńge daıyndyq aıasynda 38 jylytý pýnkti ázirlendi. Kólik qozǵalysynyń qaýipsiz ári úzdiksiz bolýyn qamtamasyz etý úshin jergilikti mańyzy bar joldarǵa 2025–2026 jyldarǵa arnalǵan maýsymǵa 13 myń tonna qum-qıyrshyq tas qospasy, 1 300 tonna tuz jáne 6 myń tonna qum-tuz qospasy daıyndalǵan.
- Aýa raıynyń kúrt nasharlaýyna baılanysty polıtsııa departamentimen birlesip, barlyq kólik túrlerine qatysty jol qozǵalysyn ýaqytsha shekteý nemese aýyr júk kólikterine tyıym salý týraly sheshim qabyldanady. Bul sharalar jol-kólik oqıǵalarynyń aldyn alýǵa baǵyttalǵan. Qabyldanǵan sheshimder tótenshe jaǵdaılar departamentine jedel túrde joldanyp, 112 biryńǵaı dıspetcherlik qyzmeti arqyly turǵyndarǵa habarlanady. 2025 jylǵy 14 qarasha men 2026 jylǵy 7 qańtar aralyǵynda oblystyq mańyzy bar avtomobıl joldary aýa raıynyń qolaısyzdyǵyna baılanysty 19 ret ýaqytsha jabyldy. Joldardy jabý jáne shekteý jumystary polıtsııa jáne tótenshe jaǵdaılar departamentterimen birlesip júrgizildi. Osy ýaqyt aralyǵynda merdiger uıymdar qar tazalaý jáne taıǵaqqa qarsy materıal sebý jumystaryn úzdiksiz atqardy, - delingen resmı málimette.
Eske sala keteıik, budan buryn BQO-da turǵyndar joldyń nasharlyǵyn aıtyp, narazylyq bildirgenin jazǵan edik.