BQO-da joldy kútip ustamaǵan mekeme basshysyna aıyppul salyndy
ORAL. KAZINFORM — Shyńǵyrlaý aýdandyq sotynda memlekettik mekeme basshysyna qatysty QR Ákimshilik quqyqbuzýshylyq týraly kodeksi 462-babynyń 3-bóligi boıynsha ákimshilik quqyqbuzýshylyq týraly is qaraldy.
BQO sotynyń baspasóz qyzmetinen málim etkenindeı, aýdandyq polıtsııa bóliminiń jol jáne tehnıkalyq qadaǵalaý tobynyń memlekettik avtoınspektory júrgizgen tekseris nátıjesinde avtomobıl joldaryn kútip-ustaýǵa jaýapty laýazymdy adamnyń óz qyzmettik mindetterin tıisinshe oryndamaǵany anyqtaldy.
Sot otyrysynda memlekettik mekeme basshysy óziniń kinásin tolyq moıyndap, aýyl ishinde qumdy-tuzdy qospalardyń tek kóshe burylystaryna shashylǵanyn aıtty. Ol qumdy-tuzdy qospalardy shashatyn tehnıka joq ekenin, adam kúshi jetispegendigin, qardan kóshelerdi tehnıkalar tazalaýǵa úlgermegendigin jetkizdi.
— Sot iske qatysýshylardy tyńdap, laýazymdy qyzmetkerdiń ýáji negizge alynbaıtynyn aıtyp, avtomobıl joldarynyń qardan tazalanbaýy men qumdy-tuzdy qospalardyń tóselinbeýi avtokólik júrgizýshileri men jolaýshylardyń ómirine qaýip tóndiredi degen tujyrymǵa keldi. Kórsetilgen mán-jaılardyń negizinde atalmysh kodekstiń 829-14, 829-16-baptaryn basshylyqqa alyp, sot laýazymdy qyzmetkerdi kináli dep taýyp, oǵan 41 286 teńge kóleminde aıyppul saldy, — dep habarlady vedomstvodan.
Eske sala keteıik, budan buryn Batys Qazaqstanda 51,2 mln teńge ákimshilik aktiniń kúshi joıylǵanyn jazǵan bolatynbyz.