BQO-da joldy qysqy kútip ustaýǵa arnalǵan tehnıkanyń 92 paıyzy jaramdy
ORAL. KAZINFORM – Batys Qazaqstan oblysynda halyqaralyq jáne respýblıkalyq mańyzy bar avtomobıl joldarynyń jalpy uzyndyǵy 1 349 shaqyrym bolsa, sonyń 1 032 shaqyrymyna «QAJservıs» JShS BQO fılıaly kútip ustaý jumystaryn júrgizedi. Atalmysh joldardyń 245 shaqyrymy kúrdeli jóndelip jatsa, 72 shaqyrymy qaıta qurylýda.
«QazAvtoJol» UK» AQ BQO fılıalynyń dırektory Asylbek Mardannyń málim etkenindeı, bıyl kútip ustaý jumystaryna 2,9 mlrd teńge bólindi.
Onyń sózine qaraǵanda, avtojol jelisine qyzmet kórsetý úshin «QAJservıs» merdiger uıymynda 4 jol paıdalaný bólimi, 3 jol paıdalaný pýnkti jáne 105 jol tehnıkasy bar.
Oblystyń Podstepnyı, Tasqala, Jympıty, Chapaev, Taıpaq jáne Jalpaqtal aýyldarynda 38 tósek-orynǵa arnalǵan 6 jylytý pýnkti jáne qysqy kútip-ustaýǵa arnalǵan 6 garaj, hımııalyq reagentterdi saqtaýǵa arnalǵan 3 qum bazasy, 6 qoıma daıyndaldy.
««QAJservıs» JShS BQO fılıalynda qysqy kútip ustaýǵa arnalǵan 76 tehnıka bolsa, kúni búgin sonyń 70-i nemese 92 paıyzy jaramdy kúıde. 6 tehnıka jóndeýdi qajet etedi, osy kezge deıin qajetti qosalqy bólshekterdiń barlyǵy alyndy. Tehnıkalardy qalpyna keltirý jumystary júrgizilýde», dedi A.Mardan.
Fılıal dırektorynyń aıtýynsha, qysqy kútimge qajetti 25 myń tonna kóktaıǵaqqa qarsy materıaldar daıyn. Jyl basynan beri joldardy kútip ustaýdy qamtamasyz etý úshin 30 arnaıy tehnıka jańadan alynsa, sonyń 20-sy – arnaıy ámbebap jol mashınasy (16 «KamAZ», tórteýi «Shahman»), beseýi – avtogreıder, beseýi – tıegish.
A.Mardannyń málimdeýinshe, jyl sońyna deıin kúrdeli jóndelip jatqan respýblıkalyq mańyzy bar Kaztalov-Jánibek-RF shekarasy jáne Ónege-Bısen-Saıqyn joly (jalpy uzyndyǵy 245 shaqyrym) paıdalanýǵa beriledi.
Sonymen qatar 72 shaqyrym Podstepnyı-Terekti-RF shekarasy (0-36, 108-144 km) jolynda qaıta jańartý jumystary qarqyndy júrgizilýde. Bıyl asfalt jamylǵysynyń tómengi qabatymen qozǵalys ashylady. Joba boıynsha jumystardy aldaǵy jyldyń mamyr aıynda aıaqtaý kózdelýde.
Oǵan qosa Samara baǵytyndaǵy RF shekarasy-Shymkent joly (0-16 – kópir ótkeli, 330-369 km) jáne Bókeı ordasy aýdany Han ordasy aýylyna kireberis jol (0-21 km) ortasha jóndeýden ótkizilýde.
Eske sala keteıik, budan buryn Oralda topyraq ústine asfalt salynyp jatqanyna baılanysty ákimdik jaýap bergenin jazǵan bolatynbyz.
