BQO-da joldarǵa JSQ jasaý kezinde 271 mln teńge negizsiz jumsalǵan
ORAL. KAZINFORM — Batys Qazaqstan oblysynda 2019 jyldan bastap jergilikti atqarýshy organdardyń tapsyrysymen avtomobıl joldary boıynsha jasalǵan 195 jobalaý-smetalyq qujattamanyń 68-i iske asyrylmaǵan.
QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Ádilhan Sabýrovtyń óńirlik kommýnıkatsııalar qyzmeti alańynda ótken brıfıngte málim etkenindeı, qazirgi ýaqytta olardy qoldanýdyń merzimi ótip ketken.
Onyń sózine qaraǵanda, saldarynan bıýdjetten 271 mln teńge negizsiz jumsalǵan. Bul jol ınfraqurylymy salasyndaǵy bıýdjet qarajatyn josparlaý men jumsaýdyń tıimsizdigin kórsetedi.
- Oblystyq ákimdikpen áleýmettik mańyzy bar nysandardy abattandyrý jónindegi birlesken jospar aıasynda departamentpen turaqty túrde jol qurylysyna monıtorıng júrgizilip, jymqyrýdyń yqtımal táýekelderi men bıýdjet qarajatyn tıimsiz paıdalaný jóninde aqparattyq hattar joldandy. Bıyl sonyń nátıjesinde shamamen 550 mln teńge bıýdjet qarajatyn jymqyrýdyń aldyn aldyq. Sonymen qatar ýaqytynda qabyldanǵan sharalardyń arqasynda bastapqy kesteden artta qalǵan 17 joldyń qurylysy aıaqtaldy, - deıdi Á.Sabýrov.
Departament basshysynyń aıtýynsha, taldaý barysynda 18 sybaılas jemqorlyq táýekeli anyqtalyp, olardy joıý úshin 44 usynys berilgen.
Negizgi táýekel – oblys boıynsha avtomobıl joldarynyń qujattalýynyń joqtyǵy.
Saldarynan joldardy salý men jóndeýdi josparlaý júıesiz júzege asyrylady, bul resýrstardy tıimsiz paıdalanýǵa, jumystardyń oryndalýyn baqylaýdyń qıyndaýyna jáne jol ınfraqurylymynyń sapasyn tómendetýge ákeledi. Mysaly, Oral qalasynda sońǵy jyldary Abaı, Nazarbaev dańǵyldary jáne Saraıshyq kóshesi birneshe ret jóndeýden ótkizilgen. Al E.Toqsanov, T.Jarokov jáne Preobrajenskaıa kóshelerinde sońǵy 20 jylda birde-bir jóndeý júrgizilmegen.
Sol sekildi ortasha jóndeýge daıyndalǵan qujattama bolǵanyna qaramastan, onyń kúrdeli jóndeýge arnalǵan jańasyn jasaý oryn alǵan. Atap aıtqanda, 2021 jyly Bókeı ordasy aýdanynda Muratsaı aýylyna kirme joldy ortasha jóndeýge 1,8 mln teńgege jobalyq-smetalyq qujattama daıyndaldy. Alaıda keıinirek sol joldy kúrdeli jóndeýge arnalǵan jańa jobalaý-smetalyq qujattama jasalǵan.
- Qazirgi ýaqytta oblystyq jolaýshylar kóligi jáne avtomobıl joldary basqarmasy 94,6 mlrd teńgege 13 jobany iske asyrýda. Alaıda tapsyrys berýshi memlekettik organnyń jol qurylysy jumystaryn ýaqytyly baqylamaýy, sondaı-aq merdiger tarapynan bolǵan kidirister jobalardyń aıtarlyqtaı qymbattaýyna ákeldi. Mysaly, 2022 jyly aıaqtalýy tıis Bórli-Aqsaı-Jympıty (68-139 km) jolynyń jóndeýi qazir bastapqyda josparlanǵannan 11 mlrd teńgege artyq, ıaǵnı 17,7 mlrd teńgeden 28,7 mlrd teńgege deıin ósti. Kóptegen buzýshylyqtarǵa qaramastan, basqarma merdigerge qatysty tıisti sharalar qabyldaǵan joq jáne joldy jóndeý jyldan-jylǵa jalǵasýda, - deıdi Á.Sabýrov.
Sonymen qatar Syrym aýdany Qosoba aýylynyń (14-29 km) kirme jolyn ortasha jóndeý jobasyn júzege asyrý aıasynda bıýdjet qarajatyn tıimsiz paıdalaný deregi anyqtalǵan.
- 2022 jyly Syrym aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi men merdiger uıym arasynda 1 mlrd 058 mln teńgege shart jasalǵan. Qurylys jumystary 2022 jyldyń jeltoqsanynda bastalyp, 2023 jyldyń jeltoqsanyna deıin tapsyrys berýshi merdigerge 948,4 mln teńge aýdarǵan. Áıtse de monıtorıng júrgizý barysynda oryndalǵan jumystar aktileri men naqty oryndalǵan jumystar arasynda 513 mln teńgege eleýli alshaqtyqtar bar ekendigi belgili boldy. Departamenttiń aralasýynan keıin buzýshylyqtar joıylyp, laýazymdy qyzmetker tártiptik jaýapkershilikke tartyldy. Nysan aıaqtalý qarsańynda, - dedi departament basshysy.
Eske sala keteıik, budan buryn Batys Qazaqstanda joldar qalaı salynyp jatqanyn jazǵan bolatynbyz.