BQO-da jolaýshylar avtobýsy men jeńil kólik soqtyǵysyp, bir adam kóz jumdy
ORAL. QazAqparat - Batys Qazaqstan oblysynda jolaýshylar avtobýsy men jeńil avtokólik soqtyǵysyp, bir adam kóz jumdy, dep habarlaıdy «QazAqparat» tilshisi.
Oqıǵa búgin tańerteń Oral-Kırsanov joly boıynda bolǵan. «Folksvagen» avtokóligi Zelenov aýdany Rýbejın aýylynan shyqqan avtobýspen túıisken.
Oblystyq densaýlyq saqtaý basqarmasynyń baspasóz qyzmetinen túsken málimetke qaraǵanda, oqıǵa saldarynan barlyǵy úsh adam zardap shekti. «Folksvagen» avtokóliginiń júrgizýshisi jedel járdem kelgenge deıin kóz jumǵan. Bir áıel adam Oraldaǵy qalalyq kópbeıindi aýrýhanaǵa jetkizilgen. Taǵy bir áıel dárigerdiń kómegine júginýden bas tartty.
Qazirgi kezde oqıǵanyń jaı-japsary anyqtalyp jatyr.
Eske sala keteıik, budan buryn 2 naýryz kúni keshkisin Oralda «Kıa» avtokóligi aıaldamada turǵan №43 baǵytta júretin avtobýspen túıisip, 4 adamnyń jaraqat alǵanyn jazǵan bolatynbyz.
Sondaı-aq onyń aldynda 27 aqpan kúni Syrym aýdany Alǵabas aýyly tusynda avtobýspen túıisken «VAZ-2114» avtokóliginiń rýlinde bolǵan aýdandyq ishki ister bóliminiń ýchaskelik ınspektory kóz jumǵan edi.
