BQO-da jol ústinde eki tirkeme órtenip, 5 tonna shóp janyp ketti
ORAL. QazAqparat – Batys Qazaqstan oblysynda jol ústinde 2 tirkeme órtenip, 5 tonna shóp janyp ketti, dep habarlaıdy QazAqparat tilshisi.
BQO TJ departamenti zilzala qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıev málim etkendeı, oqıǵa 18 maýsym kúni saǵat 14.20-da Bórli aýdany Berezov aýyly mańynda bolǵan.
Aqsaı-Shyńǵyrlaý tas jolynyń 32-shaqyrymynda shóp tıelgen eki tirkemeniń otqa oranǵany jóninde habar túsken.
«Tilsiz jaýdy» aýyzdyqtaýǵa 3 adam 1 tehnıkamen qatysty.
Qazirgi kezde órttiń shyǵý sebebi anyqtalý ústinde. Aldyn ala málimet boıynsha ot ushqyn báseńdetkishtiń aqaýynan shyqqan.
«Oblysta kúnniń ysýyna baılanysty IV dárejeli órt qaýpi jarııalandy. Sondyqtan turǵyndar, sharýa adamdary asa saq bolýy kerek. Ystyq kezde ot kez kelgen ushqynnan, temeki tuqylynan tutanýy múmkin. Shóp shabatyn, tasıtyn tehnıkalar da aldyn ala tekserýden ótýi kerek», dedi QazAqparat tilshisine E.Tóregeldıev.
Eske sala keteıik, budan buryn BQO-da kúnniń ysýyna baılanysty qurǵaq shóptiń órtenýi kóbeıip ketkenin jazǵan bolatynbyz.
20 maýsym kúni óńirde kúndiz 35-38 gradýs ystyq bolatyny jóninde de eskertý jarııalanyp otyr.
