BQO-da jol ýchaskelerinde qubyr salý jumystary tolyq aıaqtalmaı otyr

ORAL. KAZINFORM – 2026 jylǵy kóktemgi sý tasqyny kezeńine daıyndyqty baqylaý maqsatynda Batys Qazaqstan oblysy aýmaǵyndaǵy avtomobıl joldaryna tekserý jumystary júrgizildi.

BQO jolaýshylar kóligi jáne avtomobıl joldary basqarmasy basshysynyń orynbasary Murat Zalmuqanovtyń málim etkenindeı, budan eki jyl burynǵy iri sý tasqyny saldarynan avtojoldardyń 140 ýchaskesinde zaqymdaný derekteri tirkelgen bolatyn.

Murat Dúısenulynyń sózine qaraǵanda, 2024 jyly jergilikti bıýdjet rezervinen 937,9 mln teńgege 23 joba qarjylandyrylyp, 44 ýchaskede jumystar atqaryldy. Sonyń ishinde 10 ýchaskede sý ótkizgish qubyrlar ornatylyp, 34-inde aǵymdaǵy jóndeý jumystary júrgizildi.

2025 jylǵa jalpy somasy 1,9 mlrd teńgege 60 sý ótkizgish qubyrdy kúrdeli jóndeý úshin 24 joba daıyndaldy. Sonyń nátıjesinde oblystyq mańyzy bar Ańqaty-Saryómir avtomobıl jolynda 2, Shyńǵyrlaý aýdanynda 11 sý ótkizgish qubyr salyndy. Terekti aýdanynda Dýana aýylyna kirme jolǵa 2 jáne Rybtsehqa 2 qubyr salyndy.

- Alaıda 2025 jyly qarajattyń kesh bólinýine baılanysty merdiger mekeme barlyq josparlanǵan jol ýchaskelerinde qubyr salý jumystaryn tolyq aıaqtaı almady. Osyǵan baılanysty Terekti aýdanynda Satymshegen aýylyna kirme jolǵa 1, Qandyqqa 2, Qumaqsaıǵa 1 jáne Tónkeriske 2, barlyǵy 6 sý ótkizgish qubyr salý jumystary bıyl júrgiziletin bolady. Qazirgi ýaqytta merdiger uıym – «ASFA» JShS qajetti qurylys materıaldaryn aldyn ala ázirlep qoıdy, - dedi M.Zalmuqanov.

Onyń aıtýynsha, kóktemgi sý tasqyny kezeńinde halyqtyń qaýipsiz jáne úzdiksiz kólik qatynasyn qamtamasyz etý maqsatynda Shyńǵyrlaý jáne Qaratóbe aýdandarynda 3 kópir qurylysyna jobalyq-smetalyq qujattama ázirlenip, memlekettik saraptamadan ótkizildi. Atap aıtqanda, Qaratóbe aýdanynda Qaldyǵaıty, Qorjyn aýylynda Jaqsybaı jáne Shyńǵyrlaýda Shyńǵyrlaý ózeni arqyly ótetin kópir salý kózdelip otyr. Atalǵan nysandardy asa mańyzdy jáne jalpy memlekettik mańyzy bar jobalar tizbesine engizý úshin QR Kólik mınıstrliginiń Avtomobıl joldary komıtetine tıisti hat joldandy.

Sonymen qatar respýblıkalyq mańyzy bar avtomobıl joldaryn jóndeý barysynda 7 kópir jáne 96 sý ótkizgish qubyr salyndy. Oǵan qosa oblystyq mańyzy bar avtomobıl joldaryn kúrdeli jóndeý kezinde 1 kópir jáne 43 sý ótkizgish qubyr turǵyzyldy.

- Bıýdjet qarajatynyń kesh bólinýine baılanysty Shyńǵyrlaý aýdanynda sý ótkizgish qubyrlardyń betin topyraqpen jabý jumystary kúzgi mezgilde júrgizilgen. Osyǵan baılanysty qaýipti ýchaskelerde kóktemgi sý tasqyny kezeńinde táýlik boıy kezekshilik uıymdastyrý, qapshyqtar, ınertti materıaldar jáne qajetti aýyr tehnıkany (tıegish, samosval jáne ózge de arnaıy tehnıka) aldyn ala jetkizý jóninde tıisti tapsyrmalar berildi, - dep qosty basqarma basshysynyń orynbasary.

Eske sala keteıik, budan buryn Batys Qazaqstanda sý tasqynynan keler qaýip qandaı ekendigin jazǵan bolatynbyz.

Sondaı-aq sý tasqynyna daıyndyq barysynda BQO-nyń birqatar aýdanynda tehnıkalar sany sáıkes kelmeı otyr.