BQO-da jol salýdaǵy 50,5 mln teńge zań buzýshylyq: Qylmystyq is sotqa deıin jetti
ORAL. KAZINFORM – Batys Qazaqstan oblysy Bórli aýdandyq sotynda aýdandyq turǵyn úı-kommýnaldyq sharýashylyq bóliminiń burynǵy basshysy Dastan Aqmambetov pen «ShamShyń» JShS basshysy Aıbar Ǵalymjanovqa qatysty qylmystyq is qaralyp jatyr.
BQO qoǵamdyq keńesiniń múshesi, zańger Baýyrjan Ahmetjannyń málim etkenindeı, D.Aqmambetovke QR QK 361-baby 4-bólimi 3-tarmaǵy (aýyr saldarǵa alyp kelgen laýazymdyq ókilettikterdi teris paıdalaný), A.Ǵalymjanovqa QK 189-baby 4-bólimi 2-tarmaǵyna (senip tapsyrylǵan bóten múlikti ıemdenip alý nemese talan-tarajǵa salý - asa iri mólsherde jasaý) sáıkes aıyp taǵyldy.
Qazirgi kezde ekeýi de qamaýda otyr.
Zańgerdiń sózine qaraǵanda, 2021 jyly 28 maýsymda D.Aqmambetov pen A.Ǵalymjanov «Bórli aýyly ishki jolyn 335,9 mln teńgege 5 aıda kúrdeli jóndeý» shartyn jasaǵan. Alaıda mindetter tolyq ári ýaqytynda oryndalmaǵan.
- Biz 2022 jyly 1 qyrkúıekte «Ádildik joly» uıymynda júrip, qoǵamdyq baqylaý nátıjesinde Bórli aýylynda ishki jolǵa qarajat tólense de, jumys jasalmaǵanyn bildik. Aryz jazyp, fotosy men vıdeosyn Antıkorǵa berdik. Aýdıt tekserip, kósheniń jóndeýinde 50,5 mln-ǵa zań buzýshylyq tapty. 2025 jyly 29 qyrkúıekte merdiger óz erkimen bıýdjetke 19,7 mln teńgeni qaıtardy. Bir kúnnen keıin BQO mamandandyrylǵan aýdanaralyq ekonomıkalyq sotynyń sheshimimen «ShamShyń» JShS-dan taǵy da 19,5 mln óndirildi jáne 11,2 mln teńgeniń jumysyn qaıtadan jasaý mindetteldi, - deıdi B.Ahmetjan.
Bórli aýdany ákimi apparatynyń málimetine qaraǵanda, atalǵan sot sheshimi negizinde sot oryndaýshylarmen «ShamShyń» JShS-dan óńdirý jáne jumystardy jasaý boıynsha sharalar atqarylǵan. Nátıjesinde memelekettik bıýdjetke 19 531,7 myń teńge óndirildi jáne Bórli aýylynda 11 286,7 myń teńgeniń jumysy qalpyna keltirildi.
Oǵan qosa aýdan ákiminiń 2026 jylǵy 28 qańtardaǵy ókimimen sol kezde Prıýral aýyly ákimi bolyp júrgen D.Aqmambetov laýazymdyq ókilettikterin atqarýdan ýaqytsha shettetilgen.
- Qazirgi kezde atalǵan qylmystyq isti Bórli aýdandyq sotynyń sýdıasy Ásel Óskembaeva qarap jatyr, - dep qosty B.Ahmetjan.
Eske sala keteıik, budan buryn Batys Qazaqstanda 519 mln teńgege jóndelgen joldyń byt-shyty shyǵyp jatqanyn jazǵan edik.
