BQO-da jol qurylysy talaptaryn buzǵan kompanııaǵa 2,5 mln astam teńge aıyppul salyndy
ORAL. KAZINFORM — Batys Qazaqstan oblysynda Barbastaý-Aqjaıyq-Inder avtojolyn qaıta jańǵyrtý barysynda zań talaptary buzylǵany anyqtaldy.
Zańger, BQO qoǵamdyq keńesiniń múshesi Baýyrjan Ahmetjannyń Facebook áleýmettik jelisinde jazǵandaı, «Uniserv» JShS Barbastaý-Aqjaıyq-Inder avtojolyn (43-93 km) qaıta jańǵyrtýdy 3,5 jyl jasap, 2024 jyly kúzde bitirgen.
Onyń sózine qaraǵanda, 8,3 mlrd teńgege BQO jolaýshylar kóligi jáne avtomobıl joldary basqarmasymen 2021 jyly 8 sáýirde kelisim-shart jasalyp, qarjy ótken jyly qazanda ıgerilgen. Biraq áli 5 jyl kepildik merzimi bar.
— Ótken jyly qoǵamdyq baqylaý júrgizgen kezde jańa asfalttyń beti tegis emes, kóp jeriniń kóterilip ketkeni anyq baıqaldy. Aýyr júk kólikteri ózderi salǵan asfaltty qıratyp, qaıtadan búldirgen. Jol boıynda úlken tesik-shuńqyrlar óte kóp, oǵan aǵymdaǵy jóndeý jasalyp jatyr. Joldyń jıegi de talapqa saı bolmaı shyqty, — deıdi Baýyrjan Ahmetjan.
Onyń aıtýynsha, BQO memlekettik sáýlet-qurylys baqylaýy basqarmasy hattama toltyryp, ol sotta qaralǵan. Alaıda Terekti aýdandyq sotynyń sýdıasy Aınur Halyqova isti zańsyz qysqartqan.
Prokýratýranyń ótinishine sáıkes iske sýdıa Maǵıra Qıtarovanyń tóraǵalyq etýimen oblystyq sottyń apellıatsııalyq satysynda núkte qoıyldy.
BQO sotynyń bıylǵy 18 maýsymdaǵy qaýlysynda kórsetilgenindeı, qurylys-montaj jumystaryn júrgizý kezinde jobalaý-smetalyq qujattama, zańnama jáne normatıvtik-tehnıkalyq qujattar talaptarynyń buzylǵany belgili boldy.
Sot Ákimshilik quqyq buzýshylyq týraly kodeksiniń 312-baby 1-bóligine (tehnıkalyq reglamentterde belgilengen talaptardy qospaǵanda, sáýlet, qala qurylysy jáne qurylys qyzmeti salasyndaǵy Qazaqstan Respýblıkasynyń zańnamasy men memlekettik normatıvterdiń talaptaryn buza otyryp, jobalaý aldyndaǵy, izdestirý, jobalaý, qurylys-montajdaý jumystaryn oryndaý) sáıkes «Uniserv» JShS-yna 2 mln 584,4 myń teńge aıyppul saldy.
— Atalǵan kompanııa qazirgi kezde jeti baǵytta 98,7 mlrd teńgege jol qurylysy jumystaryn istep jatyr. Asfalt jol sapaly salynýy tıis. Osy oraıda qoǵamdyq baqylaý jumystaryn jalǵastyra beremiz, — dedi Baýyrjan Ahmetjan.
Eske sala keteıik, budan buryn Batys Qazaqstanda jergilikti joldar qalaı salynyp jatqanyn jazǵan edik.
Sondaı-aq Batys Qazaqstanda 40-tan astam nysanda qurylys talaptarynyń saqtalmaǵany habarlandy.