BQO-da jol-qurylys materıaly synamasynyń 220-dan astamy talapqa saı bolmaı shyqty
ORAL. KAZINFORM — «Jol aktıvteriniń ulttyq sapa ortalyǵy» RMK BQO fılıalynyń qyzmetkerleri jyl basynan beri Batys Qazaqstan oblysynyń joldarynyń sapasyn tekserý maqsatynda 258 ret saparǵa shyqty.
Fılıal dırektory Rafıs Zınetovtiń málim etkenindeı, sonyń nátıjesinde jol-qurylys materıaldarynan 864 synama alyndy. Onyń sózine qaraǵanda, sonyń ishinde 221 synama normatıvtik qujattarǵa sáıkes kelmedi. Bul rette asfaltbeton kernderiniń tyǵyzdyǵy, sýǵa qanyqtylyǵy, ınertti materıaldardyń fızıka-mehanıkalyq sıpattary, asfaltbeton qospasynyń granýlometrııalyq quramy nazarǵa alyndy, ıaǵnı sapasy tómen nemese qoldaný tehnologııasy joba talaptaryna saı kelmeıtin materıaldar anyqtaldy.
— Sonymen qatar 356 aqaýlyq pen eskertý tirkelse, sonyń 236-sy joıylǵan joq. Bular boıynsha jumystar júrgizilip jatyr. Mysaly, tehnolologııalyq talaptardyń saqtalmaýy, nysan basynda sapaǵa jaýapty tehnıkalyq baqylaý ókiliniń bolmaýy, jol jabyndysynyń joba boıynsha geometrııalyq parametrleriniń aýytqýy jáne basqa kemshilikter oryn aldy, — dedi R.Zınetov.
«Jol aktıvteriniń ulttyq sapa ortalyǵy» RMK BQO fılıalynyń málimeti boıynsha óńirde respýblıkalyq mańyzy bar joldarda 8 jobanyń úsheýi boıynsha jumystar aıaqtaldy.
Qazirgi tańda Atyraý-Oral avtojolynda 3 joba (189-249 km, 372-432 km, 432-492), Aqtóbe-Oral baǵytynda 1 (369-408 km), Chapaev-Jalpaqtal-Kaztalov-RF shekarasy jolynda 1 (0-17 km) joba júzege asyrylyp jatyr.
Eske sala keteıik, budan buryn BQO joldarynyń sapasyn teksergen kezde 250-den astam aqaý anyqtalǵanyn jazǵan edik.
