BQO-da jol ınspektorlary júıeli túrde para alý kúdigine ilindi

NUR-SULTAN. QazAqparat – Batys Qazaqstan oblysynyń Polıtsııa departamentine qarasty patrýldik polıtsııa batalonynyń birneshe ınspektory júıeli túrde para alý kúdigine ilinip otyr. Bul týraly elordada ótken baspasóz máslıhatynda Sybaılas jemqorlyqqa qarsy is-qımyl agenttiginiń birinshi departamentiniń aǵa tergeýshisi Danııar Bıgaıdarov málim etti, dep habarlaıdy QazAqparat tilshisi.

«Batys Qazaqstan oblysy boıynsha sybaılas jemqorlyqqa qarsy qyzmeti jergilikti polıtsııa departamentiniń patrýldik polıtsııa batalonynyń birneshe ınspektoryna qatysty sotqa deıingi tergeý amaldaryn júrgizip jatyr. Olarǵa top bolyp, júıeli túrde «Oral-Atyraý» jáne «Oral-Aqsaı» baǵytyndaǵy respýblıkalyq jáne oblystyq mańyzy bar joldarda 2-10 myń teńge aralyǵynda para alyp keldi degen aıyp taǵylýda», - dedi Danııar Bıgaıdarov

Sonymen qatar júrgizýshilerden para aldy degen kúdikpen patrýldik polıtsııa batalonynyń vzvod komandıri de ustaldy. Ol qazirgi ýaqytta qamaýǵa alynǵan.