BQO-da jol erejesin buzatyn qoǵamdyq kólik júrgizýshileriniń «qara tizimi» jasalmaqshy
ORAL. KAZINFORM — Batys Qazaqstan oblysynda jol-kólik oqıǵalary 10, sonyń saldarynan zardap shekkender sany 15 paıyzǵa artty.
BQO prokýrory Nurbek Ulasbekulynyń tóraǵalyq etýimen jáne oblys ákimi Narıman Tóreǵalıevtiń qatysýymen ótken zańdylyqty, quqyqtyq tártipti qamtamasyz etý jáne qylmysqa qarsy kúres jónindegi úılestirý keńesiniń otyrysynda aıtylǵanyndaı, ákimshilik quqyq buzýshylyqtardyń 75 paıyzy jol qozǵalysy erejesin buzýǵa baılanysty bolyp otyr.
BQO prokýratýrasynyń baspasóz qyzmetinen málim etkenindeı, otyrysta jol qozǵalysy qaýipsizdiginiń negizgi máseleleri qaralyp, ýákiletti jáne jergilikti atqarýshy organdardyń jumysyndaǵy kemshilikter atap ótildi.
Talqylaý qorytyndysy boıynsha joldarda quqyq buzýshylyqtardyń aldyn alý maqsatynda jasandy ıntellektini engizý týraly sheshim qabyldandy. Júıeni beınebaqylaý kameralaryna qosý josparlanyp otyr, bul quqyq buzýshylyqtardy avtomatty túrde tirkeýge jáne kólik júrgizý quqyǵynan aıyrylǵan júrgizýshilerdi anyqtaýǵa múmkindik beredi.
Sonymen qatar túngi mezgilde, ymyrtta aýyl sharýashylyǵy janýarlarynyń qatysýymen bolatyn jol-kólik oqıǵalarynyń kóbeıýine baılanysty iri qara mal men jylqylardy jaryq shaǵylystyrǵysh elementtermen (japsyrmalar, boıaý, janýarlarǵa qaýipsiz spreıler jáne moıynbaýlar) qamtý usynyldy. Mundaı is-sharalar qala syrtyndaǵy trassalarda jıi bolatyn apattardyń aldyn alýǵa baǵyttalǵan.
- Budan basqa jol qozǵalysy qaýipsizdigine qatysty máselelerdi júıeleý jáne olardy jol kartasy aıasynda kezeń-kezeńmen sheshý, sondaı-aq jolaýshylardyń ómirine qaýip tóndirgen qoǵamdyq kólik júrgizýshileriniń «qara tizimin» jasaý týraly sheshim qabyldandy. Oǵan qosa apat jıi oryn alatyn ýchaskelerde qosymsha baǵdarshamdar ornatý, jaryqtandyrý, ıntellektýaldy toraptar qurý jáne trotýarlar salý máselesin pysyqtaý tapsyryldy, - dep habarlady vedomstvodan.
Eske sala keteıik, budan buryn BQO-da jol apatynan bir adam qaza taýyp, úsheýi aýrýhanaǵa jetkizilgenin jazǵan edik.