BQO-da jol apatynan jyl saıyn júzge jýyq adam qaza tabady

ORAL. QazAqparat - Batys Qazaqstan oblysynda jyl saıyn orta eseppen 100-ge jýyq adam jol apattary saldarynan qaza tabady. Bul týraly oblys ákiminiń birinshi orynbasary Arman Óteǵulovtyń qatysýymen ótkizilgen BQO prokýratýrasynyń alqa májilisinde aıtyldy.

BQO prokýratýrasynyń baspasóz qyzmetinen túsken málimetke qaraǵanda, sońǵy bes jylda jol-kólik oqıǵalary ósip otyr. Mysaly, 2015 jyly 490 (2014 jyly - 404) jol apatynan 98 adam (84) kóz jumyp, 626-sy (573) túrli jaraqat aldy. Bıylǵy úsh aıda 84 (2015 jylǵy birinshi toqsanda - 82) jol-kólik oqıǵasynan 21 adam (8) mert bolyp, 110-y (97) jaraqattandy. Jol apattarynyń 88 paıyzy júrgizýshilerdiń kinásinen, sonyń ishinde árbir úshinshisi jyldamdyq tártibin saqtamaýdan bolyp otyr.

Óńirde jolaýshy tasymaldaıtyn avtokólikterdiń qatysýymen jol-kólik oqıǵalarynyń kóbeıýi alańdatady. Taldaý kórsetkenindeı, oblysta avtobýs júrgizýshileriniń sany sol avtokólikterdiń ózinen 6 ese kóp. Sońǵy eki jylda jol erejesin buzǵany úshin ár besinshi qoǵamdyq kólik júrgizýshisi jaýapqa tartylsa, sonyń ishinde 53-i eki, 10-y úsh márte «kózge túsken». Buǵan júrgizýshilerdiń bir-birimen básekege túsip, jarysýy áser etýde. Tipti birlesken reıdter kezinde avtobýsty týberkýlez, narkologııalyq jáne júıke aýrýlary dıspanserlerinde esepte turatyn, sondaı-aq kólik quralyn basqarýǵa quqyǵy joq adamdardyń aıdap júrgeni anyqtalǵan. Tek ótken jyly ǵana qoǵamdyq kóliktiń qatysýymen 26 jol-kólik oqıǵasy bolyp, sonyń saldarynan 7 adam qaza tapsa, 59-y jaraqat aldy.