BQO-da jol apatynan úsh adam jaraqat aldy
ORAL. QazAqparat - Batys Qazaqstan oblysynda jol apatynan úsh adam jaraqat aldy, dep habarlaıdy QazAqparat tilshisi.
Jol-kólik oqıǵasy 26 qarasha kúni keshkisin Oral-Atyraý kúre joly boıynda, qalaǵa qarasty Krýgloozernyı men Serebrıakov kentteriniń aralyǵynda boldy.
Toyota Yaris men Lada Granta kólikteri soqtyǵysqan. Sonyń saldarynan Lada Granta joldan ushyp ketken. Kýágerlerdiń sózine qaraǵanda, osy mańda kólik keptelisi de oryn aldy.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, jedel járdemge saǵat 18.13-te qońyraý shalynǵan. Oqıǵa ornyna brıgada on mınýttan keıin jetken.
«Qalalyq kópbeıindi aýrýhanaǵa úsh er adam jetkizildi. Aldyn ala málimet boıynsha 41 jasar er adam jabyq bas-mı jaraqatyn alǵan, sheke tusy kógergen. 43 jasar er adamnyń qabyrǵasy synǵan. 44 jasar er adamnyń tizesi men qabyrǵasy synǵan», - dedi A.Saqposynova.
Qazirgi kezde oqıǵanyń mán-jaıy anyqtalyp jatyr.
Aıta keteıik, BQO TJ departamenti habarlaǵanyndaı, kóktaıǵaqqa baılanysty Oral-Atyraý joly 26 qarasha kúni túngi saǵat 00.30-da jabylyp, 09.10-da qaıta ashylǵan bolatyn.
