BQO-da jol apatynan úsh adam mert boldy
ORAL. QazAqparat - Búgin tústen keıin Oral-Atyraý jolynyń 98-shaqyrymynda iri jol apaty boldy, dep habarlaıdy «QazAqparat» tilshisi.
Aqjaıyq aýdany Chapaevtaǵy trassalyq medıtsınalyq qutqarý beketiniń aǵa feldsheri Nurseıit Quspannyń sózine qaraǵanda, Býdarın aýyldyq okrýgi Samal eldi mekeni tusynda Atyraýǵa bet alǵan «Folksvagen Passat Sedan» avtokóligi «KamAZ» avtokóligin basyp ozamyn dep, «Kıa Rıo» avtokóligimen betpe-bet soqtyǵysqan. Sonyń saldarynan 40 pen 50 jas aralyǵyndaǵy eki áıel adam jedel járdem kelgenshe, oqıǵa ornynda qaza tapqan. Bes adam aýdandyq aýrýhanaǵa jetkizilgen. Sonyń ishinde jasy elýden asqan er adam qaıtys bolǵan, qalǵandarynyń da jaǵdaıy óte aýyr kórinedi. Olardyń bári de - oblys turǵyndary.
Aýdandyq aýrýhana dırektory Darhan Haırýshevtiń aıtýynsha, dárigerler qalǵandarynyń ómirin saqtap qalý úshin baryn salýda.
Qazirgi kezde jol-kólik oqıǵasynyń mán-jaıy anyqtalyp jatyr.
Apatty jaǵdaılarynyń jıileýine joldyń taıǵaqtyǵy da sebep bolýda.
Eske sala keteıik, 22 jeltoqsan kúni osy Oral-Atyraý jolynyń 94-shaqyrymynda, Býdarın aýyly mańynda qos mınıven túıisip, sonyń saldarynan eki áıel kóz jumyp, segiz adam aýdandyq aýrýhanaǵa jetkizilgen bolatyn. Sondaı-aq 29 jeltoqsan kúni Samara-Shymkent jolynyń 357-shaqyrymynda, Syrym aýdany Alǵabas aýyly tusynda «Lada Prıora» avtokóligi «Iveko» júk kóligimen soqtyǵysyp, 1984 jáne 1983 jylǵy jas adamdar mert bolǵan edi.
