BQO-da jol apatynan tiri qalǵan naýqasqa 10 saǵat ota jasaldy
ORAL. QazAqparat – Batys Qazaqstan oblysynda jol apatynan tiri qalǵan naýqasqa 10 saǵat ota jasaldy, dep habarlaıdy QazAqparat tilshisi.
QazAqparat budan buryn jazǵanyndaı, Batys Qazaqstan oblysynda jol apatynan alty adam qaza tapqan bolatyn.
Sonymen qatar Atyraý oblysynyń 42 jastaǵy turǵyny túrli jaraqatpen Aqjaıyq aýdany Taıpaq aýyldyq aýrýhanasyna jetkizilgen edi.
Oblystyq densaýlyq saqtaý basqarmasynyń baspasóz qyzmeti málim etkenindeı, aýyldyq aýrýhana dárigerleri alǵashqy tekserý kezinde ishtiń jabyq jaraqatyn baıqady. Oǵan medıtsınalyq járdem kórsetilip, em-dom qoldanyldy. Alaıda 22 aqpan kúni saǵat 22.00-ge qaraı naýqastyń jaǵdaıy nasharlaı bastady. Sol sebepti Chapaev aýylyndaǵy aýdandyq aýrýhananyń hırýrgter toby shaqyryldy. Aýrýhana dırektory, joǵary sanatty hırýrg Almas Júnisbekov pen hırýrg Dáýren Qudesov ish qýysyna ota jasady. Áıtse de áriptesterdiń járdemi qajet boldy. Kún boran edi, sondyqtan Oraldan mamandardy shaqyrý múmkin bolmady.
Kómekke Jańaqala aýdandyq aýrýhanasynyń bas dárigeri, ota jasaýda 14 jyl jáne medıtsınalyq avıatsııada tájirıbesi bar, joǵary sanatty hırýrg Serjan Esengóbekov shaqyryldy. Chapaevtan ári qaraı boranǵa baılanysty tas jol jabyq bolǵandyqtan, dárigerdiń maqsatyn bilgennen keıin ony patrýldik polıtsııa batalonynyń eki qyzmetkeri kólikterimen Taıpaqqa jetkizdi.
Osyndaı birlesken is-qımyl nátıjesinde naýqasqa 10 saǵattan astam ýaqyt boıy ota jasaldy.
«Qazir er adamnyń jaǵdaıy aýyr, ony tasymaldaý múmkin emes, degenmen jaraqat saldaryn jeńip, ómir súredi degen úmit bar», dep habarlady oblystyq densaýlyq saqtaý basqarmasynyń baspasóz qyzmeti.
Eske sala keteıik, BQO-da tabıǵı gazdan ýlanǵan 14 adamnyń aýrýhanaǵa jetkizilgenin jazǵan bolatynbyz.
