BQO-da jol apatynan qaza tapqandar sany eki ese artqan
ORAL. QazAqparat - Batys Qazaqstan oblysynda jol apatynan qaza tapqandar sany eki eseden astamǵa kóbeıip otyr. Bul týraly BQO ishki ister departamentinde ótken brıfıngte aıtyldy, dep habarlaıdy QazAqparat tilshisi.
BQO ІІD jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllınniń aıtýynsha, óńirde jol-kólik oqıǵalarynyń sany 15,7 paıyzǵa (89-dan 75-ke deıin) jáne sonyń saldarynan jaraqat alǵandar 12,4 paıyzǵa (105-ten 92-ge deıin) tómendegenine qaramastan, qaza tapqandar 2 eseden astamǵa (11-den 23-ke deıin) ósip ketip otyr.
Taldaý kórsetkenindeı, adam ólimine soqtyrǵan jol apattarynyń kópshiligi jyldamdyqty shekten tys arttyrý saldarynan bolyp otyr. Buryn jol nashar bolsa, sońǵy jyldary onyń sapasy birte-birte jaqsaryp keledi. Taqtaıdaı tegis jolda júrgizýshiler tártipti jıi buzatyn boldy. Tek bıylǵy tórt aıdyń ózinde jyldamdyqty shekten tys arttyrý boıynsha 6 myńnan astam quqyqbuzýshylyq tirkelgen, bul ótken jylǵydan 1,5 esege (3813-ten 6204-ke jetken) kóp. Barlyǵy tórt aıda 31906 jol erejesin buzýshylyq tirkelgen, bul ótken jylǵydan (28052) 13,7 paıyzǵa artyq.
Sol sııaqty jol apattarynyń jıileýine avtokóliktiń kóbeıýi, ásirese, jastar arasynda qarapaıym júrgizýshilik daǵdynyń bolmaýy jáne basqa sebepter áser etýde.
«Osyǵan baılanysty ishki ister departamenti basshylyǵy 5 mamyr - 5 maýsym aralyǵynda oblys aýmaǵynda jol-kólik oqıǵalarynyń aldyn alý baǵytynda aılyq jarııalady. Aılyq barysynda «Jyldamdyq», «Jaıaý júrginshi», «Arnaıy belgi», «Mas júrgizýshi», «Mototsıkl» sekildi jedel aldyn alý sharalary ótkiziletin bolady», dedi M.Ǵabdýllın.
Eske sala keteıik, jol-kólik oqıǵalary mamyr aıy bastalǵannan beri de tyıylar emes. Mysaly, 2 mamyr kúni Aqjaıyq aýdany aýmaǵynda avtobýs pen júk kóliginiń betpe-bet túıisýinen qos birdeı júrgizýshi qaza tapsa, taǵy bireýiniń aýyr jaraqat alǵanyn jazǵan bolatynbyz. Odan keıin 4 mamyrda Oral qalasynda «Lada Prıora» avtokóligi qyz balany, búgin júk kóligi jasóspirimdi qaǵyp ketti.
