BQO-da jol apatynan bir adam qaza taýyp, tórteýi aýrýhanaǵa jetkizildi
ORAL. QazAqparat – Batys Qazaqstan oblysynda jol apatynan bir adam qaza taýyp, tórteýi aýrýhanaǵa jetkizildi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 4 jeltoqsan kúni keshkisin Oral-Atyraý jolynyń 89-shaqyrymynda bolǵan.
Aqjaıyq aýyly Samal aýyly tusynda 1985 jylǵy júrgizýshi «KamAZ» avtokóligimen qarsy betke shyǵyp ketip, 1989 jylǵy azamat aıdap kele jatqan «Lada Prıora» avtokóligimen betpe-bet soqtyǵysýǵa jol bergen.
Sonyń saldarynan jeńil kólikte otyrǵan 1981 jyly týǵan er adam oqıǵa ornynda qaza tapty. 1987 jylǵy taǵy bir jolaýshy Chapaev aýylyndaǵy aýdandyq ortalyq aýrýhanaǵa jatqyzyldy.
Osy oqıǵa boıynsha QR QK 345-baby 3-bóligine sáıkes qylmystyq is qozǵalyp, tergeý amaldary júrgizilýde.
BQO TJ departamentiniń baspasóz hatshysy Jádiger Qusaıynov Chapaev trassalyq medıtsınalyq-qutqarý beketiniń 4 qyzmetkeri oqıǵa ornyna shuǵyl jetip, tórt adamdy qutqarǵanyn málimdedi. 1987 jáne 1989 jyy týǵan er, sondaı-aq 1987, 1995 jylǵy áıel adamdar aýrýhanaǵa jetkizildi.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, jabyq bas-mı jaraqatyn alyp, jeńil dárejede mıy soǵylǵan 32 jastaǵy áıel aýrýhanaǵa jatqyzylyp, qalǵan úsheýi ambýlatorlyq em alýǵa jiberildi.
Aıta keteıik, óńirde kóktaıǵaq saldarynan jol-kólik oqıǵalary jıilep otyr.
