BQO-da jol apatynan bir adam qaza taýyp, ekinshisi aýrýhanaǵa tústi
ORAL. QazAqparat - BQO-da jol apatynan bir adam qaza taýyp, ekinshisi aýrýhanaǵa tústi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 14 sáýir kúni shamamen saǵat 17.20-da Bórli-Aqsaı jolynyń 15-shaqyrymynda oryn aldy.
Aqsaıdan shyqqan 1986 jylǵy júrgizýshi «Folksvagen Passat» avtokóliginiń rýline ıe bola almaı, aýdarylyp qalýyna jol bergen.
Sonyń saldarynan júrgizýshi oqıǵa ornynda qaza tapty. 1992 jylǵy er adam Bórli aýdandyq aýrýhanasynyń jansaqtaý bólimine es-tússiz kúıinde jetkizildi.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, tiri qalǵan turǵyn kelesi kúni esin jıdy. Qazir ol oblystyq kópbeıindi aýrýhanada emdelýde.
Eske sala keteıik, budan buryn Oralda bes avtokólik túıisip, 19 jasar qyzdyń aýrýhanaǵa jetkizilgenin jazǵan bolatynbyz.
