BQO-da jol apatynan 4 adam qaza taýyp, altaýy aýrýhanaǵa jetkizildi
ORAL. QazAqparat – Batys Qazaqstan oblysynda jol apatynan 4 adam qaza taýyp, altaýy aýrýhanaǵa jetkizildi, dep habarlaıdy QazAqparat tilshisi.
BQO TJ departamenti baspasóz qyzmetiniń málim etkenindeı, oqıǵa 26 aqpan kúni Aqjaıyq aýdany aýmaǵynda boldy.
Saǵat 03.29-da Atyraý-Oral jolynyń 259-shaqyrymynda Atameken aýylynan 10 km jerde eki «Toıota Kamrı» avtokóligi soqtyǵysty.
Sonyń saldarynan eki kóliktegi 4 jolaýshy kóz jumyp, alty adam Taıpaq aýylyndaǵy aýrýhanaǵa jetkizildi.
BQO polıtsııa departamentiniń resmı ókili Bolatbek Belgibekovtiń naqtylaýynsha, aýa raıynyń nasharlaýyna baılanysty atalmysh baǵyttaǵy kúre joldy 26 aqpan kúngi saǵat 00.00-den bastap jabý týraly sheshim qabyldanǵan bolatyn. Alaıda taksı júrgizýshisi polıtsııa qyzmetkerleriniń zańdy talabyna baǵynbaǵan. Sonyń saldarynan eki kóliktiń betpe-bet túıisýine jol bergen. Onyń polıtsııa qyzmetkerleriniń talabyna baǵynbaǵany jóninde beınejazba bar.
Eske sala keteıik, budan buryn BQO-da jol apatynan alty adamnyń qaza tapqanyn, tiri qalǵan naýqasqa 10 saǵat ota jasalǵanyn, turǵyn úıden eki zeınetkerdiń máıiti tabylǵanyn jazǵan bolatynbyz.
Sondaı-aq Batys Qazaqstanda qatty jelge baılanysty birneshe jol jabyldy.
