BQO-da jol apatynan 24 jaıaý júrginshi qaza tapty
ORAL. QazAqparat - Batys Qazaqstan oblysynda sońǵy kezde jaıaý júrginshilerdiń qatysýymen jol-kólik oqıǵalary jıilep otyr, dep habarlaıdy «QazAqparat» tilshisi.
BQO ІІD jergilikti polıtsııa qyzmetiniń qyzmetkerleri júrgizgen «Jaıaý júrginshi» reıdinde belgili bolǵanyndaı, Oraldaǵy Qurmanǵazy kóshesi boıyndaǵy «Oqýshy» aıaldamasy tusynda tek jarty saǵattyń ishinde elýden astam jaıaý júrginshi jol erejesin buzǵan. Bolmaıtyn jerden ótkeni úshin júrginshi 5 AEK (1 AEK - 2269 teńge) kóleminde aıyppul tóleıdi.
BQO ІІD jergilikti polıtsııa qyzmetiniń ınspektory Gaýhar Qaramenovanyń aıtýynsha, eń ókinishtisi, ata-analar balalarymen, zeınetkerler kez kelgen jerden ótip jatady. Kópshiligi jaıaý júrginshi ótkeli nemese baǵdarsham arqyly ótýge erinedi. Sonyń kesirinen apatty jaǵdaılar týyndap jatady.
Aıta keteıik, jaıaý júrginshiniń qatysymen bolatyn oqıǵalar jol apattary ishinde aldyńǵy oryndardyń birin ıelenedi. Atap aıtqanda, jyl basynan beri 147 osyndaı jol-kólik oqıǵasy tirkelip, sonyń saldarynan 24 adam qaza tapty, 132-si túrli jaraqat aldy. Sonyń ishinde 19 oqıǵa jaıaý júrginshiniń kinásinen bolyp, 5 adam kóz jumyp, 16-sy jaraqat aldy. Sondaı-aq bıyl júrgizýshilerdiń jaıaý júrginshilerdi ótkizbeýine baılanysty 666 quqyqbuzýshylyq tirkelgen. 2533 júrginshi erejeni ózderi buzǵan.
