BQO-da jol apatyn jasaǵan eki mas júrgizýshiniń kólikteri otqa orandy

ORAL. QazAqparat – Oral qalasynda eki avtokólik túıisip, úsh adam jaraqat aldy, dep habarlaıdy QazAqparat tilshisi.

BQO Tótenshe jaǵdaılar departamentiniń baspasóz qyzmetinen málim etkenindeı, oqıǵa 10 sáýir kúni saǵat 22.11-de Zachagan kentinde boldy.

Jáńgir han men E.Brýsılovskıı kósheleriniń qıylysynda «Lada Prıora» men «VAZ-2115» avtokóligi soqtyǵysty. Sonyń saldarynan «Lada Prıora» avtokóligi otqa oranyp, jalyn saǵat 22.34-te sóndirildi.

BQO Polıtsııa departamentinen túsken málimetke qaraǵanda, «Lada Prıora» avtokóliginiń júrgizýshisi mas kúıinde bolǵan. Oqıǵanyń mán-jaıyn anyqtaý úshin birneshe saraptama taǵaıyndaldy.

BQO densaýlyq saqtaý basqarmasynyń baspasóz qyzmetinen naqtylaǵanyndaı, jol apatynan úsh adam zardap shekti. Aldyn ala málimet boıynsha, 22 jastaǵy eki jáne 24 jastaǵy jigit jabyq bas-mı jaraqatyn alǵan, mılary shaıqalǵan. Basqa da jaraqattary bar. Úsheýi de oblystyq kópbeıindi aýrýhanaǵa jetkizilgen.

Sondaı-aq keshe saǵat 18.31-de Duster avtokóliginiń júrgizýshisi rýlge ıe bola almaı, elektr baǵanyna soǵylyp, bul kóliktiń motor bóligi janǵan. 1963 jylǵy júrgizýshi medıtsınalyq kýálandyrýǵa sáıkes orta dárejeli mas kúıinde bolǵan.