BQO-da jol apatynda jolaýshy qaza tapty: júrgizýshi sottaldy

ORAL. KAZINFORM – Syrym aýdandyq sotynda jol apaty saldarynan adam qaza bolyp, jol-kólik apatyna qatysy bar júrgizýshige qatysty úkim shyqty. 

BQO sotynyń baspasóz qyzmetinen málim etkenindeı, jeńil kólik aıdap kele jatqan júrgizýshi júk kóligimen soqtyǵysqan.

Saldarynan jeńil avtokólikte otyrǵan jolaýshy kóz jumǵan.

- Sot sottalýshynyń kinásin tolyq moıyndaǵanyn, birinshi ret abaısyzda qylmys jasaǵanyn qylmystyq jaýaptylyq pen jazany jeńildetetin mán-jaı retinde eskerdi. Sot úkimi boıynsha atalǵan turǵyn QK 345-baby 3-bóligine sáıkes aıypty dep tanylyp, oǵan 2 jyl 6 aı merzimge bas bostandyǵynan aıyrý jazasy kesildi. Sonymen qatar ol 5 jyl merzimge kólik quralyn basqarý quqyǵynan aıyryldy. Úkim zańdy kúshine engen joq, - dep habarlady vedomstvodan. 

Eske sala keteıik, budan buryn BQO ákimdiginiń burynǵy qyzmetkeri qamaýǵa alynǵanyn jazǵan edik.