BQO-da jol apatyna ushyraǵan shaqalaqtyń jaǵdaıy óte aýyr

ORAL. KAZINFORM — Batys Qazaqstan oblysynda jol apatyna ushyraǵan shaqalaqtyń jaǵdaıy óte aýyr.

Budan buryn jazǵanymyzdaı, jol apatynan júrgizýshi men jolaýshy kóz jumǵan bolatyn.

BQO densaýlyq saqtaý basqarmasy baspasóz qyzmetiniń naqtylaýynsha, 21 jeltoqsan kúni saǵat 16.04-te bolǵan jol-kólik oqıǵasynan 7 adam zardap shekti.

Sonyń ishinde bireýi oqıǵa ornynda qaza tapsa, bir bala kólikpen Aqjaıyq aýdandyq aýrýhanasyna bara jatqan jolda kóz jumdy.

— Qalǵan bes adam jedel járdem kóligimen Aqjaıyq aýdandyq aýrýhanasyna aparyldy. Qazirgi tańda 1974 jáne 1994 jylǵy eki áıel men 1995 jylǵy er adamǵa ota jasalyp, oblystyq kópbeıindi aýrýhanada em alýda. Jaǵdaılary ortasha aýyr, turaqty. Týǵanyna eki kún bolǵan sábı (qyz bala) oblystyq kópbeıindi balalar aýrýhanasyna joldandy, jaǵdaıy óte aýyr. 1948 jylǵy áıel Aqjaıyq aýdandyq aýrýhanasynda qajetti emin alýda, jaǵdaıy ortasha aýyr, — dep habarlady vedomstvodan.

Eske salsaq, 21 jeltoqsan kúni Chapaev-Jańaqala jolynda jantúrshigerlik jol apaty boldy.