BQO-da joǵalyp ketken 22 jastaǵy qyz 7 saǵattan keıin daladan tabyldy
ORAL. KAZINFORM — Batys Qazaqstan oblysy Terekti aýdanynda polıtsııa qyzmetkerleri joǵalyp ketken 22 jastaǵy qyzdy 7 saǵattan keıin aman-esen tapty.
BQO polıtsııa departamentiniń baspasóz qyzmetinen túsken málimetke qaraǵanda, qyz 16 jeltoqsanǵa qaraǵan túni Alǵabas stantsııasynan belgisiz baǵytta shyǵyp ketken.
Anasy qyzynyń joǵalyp ketkeni jóninde saǵat 22.00-de Terekti aýdandyq polıtsııa bólimine habarlaǵan. Sol boıda barlyq jeke quram dereý izdestirý jumystaryna jumyldyryldy. Sondaı-aq qyzdy izdeýge ákimdik qyzmetkerleri, azamattyq qorǵanys ókilderi jáne jergilikti turǵyndar belsendi túrde atsalysty.
— Polıtseıler dalalyq jerlerge erekshe nazar aýdaryp, túngi ýaqytta keń aýmaqty muqııat sholyp shyqty. 7 saǵatqa sozylǵan izdeý nátıjesinde tańǵy saǵat 05.00 shamasynda boıjetken óz úıinen 15 shaqyrym qashyqtyqtaǵy dalada, Aqsaı qalasyna qaraı bet alyp bara jatqan jerinen tabyldy. Qyzdyń jaǵdaıy qanaǵattanarlyq dep baǵalandy. Qatty aıazǵa qaramastan, úsik shalý belgileri baıqalmaǵan. Oǵan polıtsııa qyzmetkerleri dereý alǵashqy medıtsınalyq kómek kórsetip, úıine jetkizdi. Qazirgi ýaqytta boıjetken anasynyń janynda, jaǵdaıy jaqsy», — dep habarlady vedomstvodan.
Eske sala keteıik, budan buryn Batys Qazaqstanda ózennen er adamnyń denesi tabylǵanyn jazǵan edik.