BQO-da joǵalǵan oqýshy tabyldy
ORAL. QazAqparat – Batys Qazaqstan oblysynda joǵalǵan oqýshyny izdeýmen polıtseıler, áskerıler men eriktiler aınalysty, dep habarlaıdy QazAqparat tilshisi.
BQO Polıtsııa departamentiniń resmı ókili Bolatbek Belgibekovtiń aıtýynsha, 12 jastaǵy 5-synyp oqýshysy 19 tamyz kúni saǵat shamamen 15.00-de Terekti aýdany Podstepnyı aýylynda joǵaldy.
Ol Oral qalasynda ata-anasymen birge turady. Sol kúni aýyldaǵy «PMK» aıaldamasynan ketkennen oralmaǵan.
Óz betimen izdeý nátıje bermegennen keıin saǵat 19.10-da anasy polıtsııaǵa júgingen.
Polıtsııa departamentiniń bastyǵy Maqsuthan Ablazımovtiń basshylyǵymen izdestirý jumystaryna Terekti aýdany polıtsııa bólimi men Oral qalasy polıtsııa basqarmasynyń jeke quramy jumyldyryldy. Sondaı-aq Oraldaǵy 5517-áskerı bóliminen 70 jaýynger, Podstepnyı aýyldyq okrýgi ákimdigi qyzmetkerleri jáne jurtshylyq ókilderi kómekke keldi.
«Saǵat 23.00-de Oral qalasy polıtsııa basqarmasy patrýldik polıtsııa batalonynyń ınspektory Arman Bısenǵalıev pen stajer Baqytjan Qonarbaı balany shahardaǵy Qurmanǵazy kóshesindegi úıdiń aýlasynan tapty. Jasóspirim qazir otbasymen birge. Oqıǵanyń jaı-japsary anyqtalý ústinde», - dedi QazAqparat tilshisine B.Belgibekov.
Balanyń ata-anasy jedel qımyldaǵan polıtsııa qyzmetkerleri men izdeýge qatysqandardyń bárine rızashylyǵyn bildirdi.
