BQO-da jylqy egisti taptaǵan: mal ıelerinen 0,9 mln teńge óndirildi

ORAL. KAZINFORM — Shyńǵyrlaý aýdanynda sharýa qojalyǵynyń basshysy eginin tapaǵan 70 bas jylqy ıeleri men jylqyshydan materıaldyq shyǵyndy óndirýdi talap etip, sotqa júgindi. BQO sotynyń baspasóz qyzmetinen málim etkenindeı, sharýa qojalyǵy jalǵa alǵan 30 gektarǵa egilgen jazdyq bıdaıǵa jylqylar túsken.

Jylqyshy QR Ákimshilik quqyq buzýshylyq týraly kodeksiniń 408-baby 1-bóligine sáıkes aıyppul tólegenimen, komıssııalyq akt boıynsha maldyń tapaýy saldarynan qojalyqtyń 1,3 mln teńge paıdadan aıyrylǵany belgili boldy. 

Shyńǵyrlaý aýdandyq soty isti qaraı otyryp, Azamattyq kodekstiń 917-baby 1-tarmaǵyna nazar aýdardy. Soǵan sáıkes múliktik zalal keltirgen adamdar ony tolyq kólemde óteýi tıis.
Sot jaýapkerlerdiń komıssııalyq tekserýge qatyspaǵandyǵy jáne keltirilgen shyǵyndy esepteýmen kelispeıtindigi týraly ýájderin negizsiz dep sanady. Akt jalǵyz talap qoıýshy ǵana emes, iske múddeli taraptardyń, sonyń ishinde aýyldyq okrýg ákimdigi ókiliniń qatysýymen jasaldy. Esep-qısap jergilikti atqarýshy organnyń málimetteri boıynsha júrgizilgen.

Ákimshilik quqyq buzýshylyq týraly hattama jáne akt jaýapkerler jylqylarynyń sharýa qojalyǵy jerindegi dándi daqyldarǵa zııan keltirgenin rastaıtyn senimdi dáleldeme bolyp esepteledi.

— Aıyppuldy jylqyshy tólegen, sondyqtan oqıǵanyń oryn alǵany, zııan keltirýshiniń kinási anyqtaldy. Jylqylardyń jaýapkerlerge tıesili, olardyń sany týraly málimetter rastaldy. Osynyń bárin eskere otyryp, sot Azamattyq kodekstiń 935-baby 5-bóligine sáıkes jaýapkerlerden 900 myń teńgeni óndirdi. Sot sheshimi zańdy kúshine endi, — dep habarlady vedomstvodan.

Eske sala keteıik, budan buryn BQO-da áleýmettik jelide bılik ókilin qorqytyp, balaǵattaǵan turǵynnyń sottalǵanyn jazǵan bolatynbyz.