BQO-da jergilikti joldardy jóndeý baǵytynda 50 joba júzege asyrylyp jatyr
ORAL. KAZINFORM – Batys Qazaqstan oblysynda bıyl «Qýatty óńirler – el damýynyń draıveri" ulttyq jobasy, sondaı-aq "Aýyl – el besigi» baǵdarlamasy aıasynda 91,6 mlrd teńgege 642 shaqyrymnan astam joldy jóndeý kózdelgen.
BQO jolaýshylar kóligi jáne avtomobıl joldary basqarmasynyń basshysy Marat Qýanshalıevtiń málim etkenindeı, oblystyq jáne aýdandyq mańyzy bar avtojoldar boıynsha 36,2 mlrd teńgege 50 joba júzege asyrylýda. Barlyǵy 328,5 shaqyrym jol jóndeýmen qamtylǵan.
Onyń sózine qaraǵanda, oblystyq mańyzy bar joldarda úsh joba boıynsha qaıta jańartý jumystary júrgizilýde. Atap aıtqanda, Barbastaý-Aqjaıyq-Inder avtojolynyń (43-93 km) 50 shaqyrymy 2021 jyldan beri jańartylýda.
«Jobanyń jalpy quny – 8,3 mlrd teńge. Bıyl bul nysandy aıaqtaýǵa 3,2 mlrd teńge bólindi. Osyǵan deıin 43 shaqyrymǵa asfalt-beton tóseldi. Atalmysh jobany kestege sáıkes aldaǵy aıda aıaqtaý josparlanyp otyr», dedi M.Qýanshalıev.
Sol sekildi Bórli-Aqsaı-Jympıty avtojolynda (68-139 km) 71 shaqyrymdy jańartý 2021 jyldan beri jalǵasýda. Munyń jalpy quny – 27,5 mlrd teńge. 2024 jyly 10 shaqyrym jol 3,5 mlrd teńgege asfalttaldy. Bul nysan aldaǵy jyly máresine jetpekshi.
Sondaı-aq Chapaev-Jańaqala-Saıqyn avtojolynda (130-191 km) 2021 jyldan bastap 61 shaqyrym (joba quny - 18,8 mlrd teńge) retke keltirilýde. Bıyl 4,5 mlrd teńgege 10,5 shaqyrym jol salyndy. Muny da 2025 jyly bitirý kózdelýde.
Basqarma basshysy jergilikti avtojoldardy kúrdeli jáne ortasha jóndeý jumystary da júrgizilip jatqanyn jetkizdi.
«Batys Qazaqstanda avtomobıl joldarynyń jalpy uzyndyǵy 6 183 km bolsa, sonyń 1 349-y – respýblıkalyq, 4 834 shaqyrymy – jergilikti joldar. Bıylǵy 1 qańtardaǵy málimet boıynsha respýblıkalyq mańyzy bar avtojoldardyń normatıvtik jaǵdaıdaǵy úlesi 73 paıyz bolsa, jergilikti joldardiki – 52 paıyz», dedi M.Qýanshalıev.
Eske sala keteıik, budan buryn Oralda topyraq ústine asfalt salynyp jatqanyna baılanysty ákimdik jaýap bergenin jazǵan bolatynbyz.
Sondaı-aq BQO-da joldy qysqy kútip ustaýǵa arnalǵan tehnıkanyń 92 paıyzy jaramdy.
