BQO-da jer zańnamasyn buzǵan sheneýnikterge aıyppul salyndy
BQO jerdiń paıdalanylýy men qorǵalýyn baqylaý basqarmasynyń basshysy Salaýat Ǵabbasovtyń Óńirlik kommýnıkatsııalar qyzmetinde ótken brıfıngte málim etkenindeı, osyǵan qatysty jyl basynan beri óńirde 202 tekseris júrgizilgen.
Sonyń nátıjesinde 164 zańbuzýshylyq anyqtalyp, 94 tulǵaǵa 17 mln 844,5 myń teńge aıyppul salyndy. Qazirgi kezde sonyń 14 mln astam teńgesi óndirildi.
«Jergilikti atqarýshy organdardyń, Qazaqstan Respýblıkasynyń jer zańnamasy salasynda qabyldaǵan sheshimderiniń zańdylyǵy jáne jeke, sondaı-aq zańdy tulǵalardyń jer telimderine tıisti quqyq berý týraly ótinishterin qaraý boıynsha tıisti jumystar atqarylýda. Mysaly, Jańaqala, Syrym aýdandary jáne Mıchýrın aýyldyq okrýgi ákimderi sheshimderiniń zańdylyǵyna baılanysty tekserý amaldary júrgizilip, nátıjesinde zańbuzýshylyqty joıý jóninde nusqamalardy oryndaý týraly hattar joldandy. Zańdy jáne jeke tulǵalardan túsken aryz-shaǵymdar negizinde, olardyń ótinishhattaryn qaraýdyń belgilengen merzimderin buzǵany úshin QR Ákimshilik quqyqbuzýshylyq kodeksi 137-baby 2-tarmaǵyna sáıkes Oral qalalyq jer qatynastary bóliminiń basshysy Arman Bısembalıevke, orynbasary Álııa Arystanova jáne Bórli aýdany ortalyǵy Aqsaı qalasy ákimi apparatynyń bas mamany Jadyra Qýanyshevaǵa jalpy somasy 108 myń 225 teńge aıyppul salynyp, óndirildi»,- dedi Salaýat Ǵabbasuly.
Aıta keteıik, BQO jer qatynastary basqarmasynyń basshysy Álııa Muqanbetjanova keltirgen málimetke qaraǵanda, oblysta 2012-2018 jyldary 1 mln 448 myń gektar jerdiń paıdalanylmaǵany anyqtalyp, kúni búginge deıin sonyń 1022 myń gektary qaıtaryldy.
Aýyl sharýashylyǵy aınalymyna qaıtarylmaǵan 431 myń gektar jerdiń negizgi bóligi Aqjaıyq, Bórli, Jánibek, Qaztalov, Syrym jáne Shyńǵyrlaý aýdandarynyń úlesine tıedi. Bul jerler shalǵaıda ornalasqan ári ónimdiligi tómen.
Tıisti túsinik jumystary júrgizilgennen keıin jer paıdalanýshylar 361 myń gektar jerdi ıgerdi.
Qazirgi tańda anyqtalǵan jerlerden 65 myń gektar qaıtarylmaı otyr, bul boıynsha uıǵarymdar berildi. Uıǵarym merzimi bitkennen keıin qaıta tekseris júrgiziletin bolady.
