BQO-da jer komıssııasynyń sheshimderi zańsyz dep tanyldy
ORAL. KAZINFORM — Batys Qazaqstan oblysy Aqjaıyq aýdanynyń № 2 aýdandyq sotynda azamattardyń atalmysh aýdan ákimine jáne aýdandyq jer qatynastary bólimine qatysty ákimshilik talap qoıýlary qaraldy.
BQO sotynyń baspasóz qyzmetinen málim etkenindeı, talap qoıýshylar jer komıssııasynyń qorytyndy sheshimderin, sol sheshimder negizinde qabyldanǵan ákimdiktiń qaýlylaryn jáne jalǵa alý sharttaryn zańsyz dep tanýdy suraǵan.
Іsti qaraý barysynda sot jer ýchaskelerin berý jónindegi konkýrsty uıymdastyrý jáne ótkizý kezinde QR Jer kodeksi men konkýrs ótkizý qaǵıdalarynyń talaptary saqtalmaǵanyn anyqtady.
Sottyń qorytyndysyna sáıkes, konkýrs rásimi barysynda ótinimderdi qabyldaý, olardy baǵalaý, konkýrs jeńimpazdaryn aıqyndaý jáne sheshimderdi rásimdeý kezinde zań talaptarynyń buzylýyna jol berilgen. Sonymen qatar konkýrsqa qatysýshylardyń qujattary tıisti túrde tekserilmegen, al qabyldanǵan sheshimder jetkilikti dárejede negizdelmegen.
— Osyǵan baılanysty sot talap qoıýlardy ishinara qanaǵattandyryp, jer komıssııasynyń qorytyndy hattamalaryn jáne solardyń negizinde qabyldanǵan ákimdik qaýlylaryn zańsyz dep tanyp, kúshin joıdy. Sondaı-aq atalǵan qaýlylar negizinde jasalǵan jer ýchaskelerin jalǵa alý sharttary jaramsyz dep tanyldy. Budan bólek, aýdan ákimdigine zań talaptaryna sáıkes jer komıssııasynyń otyrysyn qaıta ótkizýdi qamtamasyz etý mindeti júkteldi, — dep habarlady vedomstvodan.
Eske sala keteıik, budan buryn BQO-daǵy aýylda qos birdeı saıabaqtyń kútimsiz qalǵany ras pa, sony jazǵan edik.
