BQO-da jer kezegine turýshylar sany kúrt artty

ORAL. QazAqparat – Batys Qazaqstan oblysynda jer kezegine turǵandar sany 158 myńnan asty, dep habarlaıdy QazAqparat tilshisi.

Byltyrǵy qarasha aıynda óńirde jer kezeginde turǵandar sany 105 myńǵa jýyqty quraǵan bolatyn. Jeti aıda bul tizim kúrt ulǵaıdy.

BQO jer qatynastary basqarmasynyń basshysy Murat Ómirálıev málim etkenindeı, qazirgi tańda jeke turǵyn úı qurylysyna arnalǵan jer telimin alý úshin 158 261 adam esepte tursa, sonyń 108 490-y Oral qalasynyń turǵyny.

Onyń aıtýynsha, úı salý úshin oblys aýdandarynda 2021 jyly 250, bıyl 117 jer telimi berildi.

Kúni búgin ınjenerlik júıelermen qamtamasyz etilip, tabystaýǵa daıyndalǵan jer telimderiniń sany – 2650. Sonyń ishinde Oral qalasyna qarasty Krýgloozernyı kenti aýmaǵynda – 1141, Aqjaıyq aýdanynda – 270, Bórlide – 257, Jańaqalada – 110, Báıterekte – 143, Kaztalovta – 140, Terektide 528 jer telimi kezekte turǵandarǵa berilmek.

Basqarma basshysynyń aıtýynsha, Qazaqstan Prezıdenti jeke turǵyn úı qurylysy úshin jer telimderin alýǵa kezekte turǵandardyń biryńǵaı tizilimin ázirleýdi tapsyrǵan bolatyn. Osy maqsatta QR Tsıfrlyq damý, ınnovatsııalar jáne aeroǵarysh ónerkásibi, Aýyl sharýashylyǵy mınıstrligi jáne jergilikti atqarýshy organdar tarapynan buryn kezekke turǵan azamattardyń tizimderin biryńǵaı júıege engizý jumystary júrgizildi.

Sonymen qatar ashyqtyqty qamtamasyz etý maqsatynda jeke turǵyn úı qurylysyna arnalǵan jer telimin alýǵa kezekke qoıý protsesi avtomattandyryldy. Bıylǵy 25 naýryzdan bastap ár azamat jeke turǵyn úı qurylysyna arnalǵan jer telimine kezekke eGov.kz portaly arqyly tura alady.

«Bul rette jer berý tártibi ózgermegenin atap ótkim keledi, ıaǵnı azamattardyń ótinishteri jeke turǵyn úı qurylysy úshin paıdalanylatyn bos aýmaqtar bar bolǵan jaǵdaıda, tıisti ınjenerlik jelilermen qamtylyp, daıyn bolýyna qaraı qanaǵattandyrylady. EGov.kz portaly arqyly kezekke qoıý jáne kezekten shyǵarý qyzmeti azamattardyń tek ózderine ǵana qoljetimdi, ETsQ arqyly júzege asyrylady, al derekterdi ózektendirý ýákiletti organdar arqyly júrgiziledi», dedi M.Ómirálıev.

Budan buryn BQO-da 451 myń gektar aýylsharýashylyq jeri paıdalanylmaı jatqanyn habarlaǵan bolatynbyz.