BQO-da jer berýde zańnamany buzǵan ákimdik qyzmetkerlerine aıyppul salyndy
ORAL. KAZINFORM – Batys Qazaqstan oblysy Syrym aýdanynda jer komıssııasynyń qorytyndysyn shyǵarý kezinde zańnamanyń buzylǵany anyqtaldy.
BQO sotynyń baspasóz qyzmetinen málim etkenindeı, aýyl turǵyny 2023 jyly sharýa qojalyǵyn júrgizý úshin jer telimin alýǵa tenderge qatysqan, biraq basqa tarap jeńimpaz dep tanylǵan.
Sot daýynan keıin talap qoıýshynyń quqyǵy qorǵalyp, 2023 jylǵy tender qorytyndysy jaramsyz dep tanyldy. Alaıda aýdandyq ákimdik baıqaý jeńimpazyn aıqyndaý boıynsha rásimderdi aıaqtamaı jáne onyń qorytyndylaryn qaıta qaramaı, eki jyldan keıin sol jer telimine qatysty taǵy bir baıqaý jarııalap, jeńimpaz retinde basqa tulǵany anyqtaǵan. Bul joly da talap qoıýshy baıqaýda jeńilis tapqan.
Baıqaý qujattamasyn zerdeleý talap qoıýshynyń barlyq ólshemsharttar boıynsha tolyq basymdyǵyn jáne jer komıssııasy músheleri tarapynan basqa tulǵany jeńimpaz dep tanýdyń sebepteri negizdelmegenin kórsetti. Jaýapker Qazaqstan Respýblıkasy Konstıtýtsııalyq sotynyń 2025 jylǵy 16 sáýirdegi «Qazaqstan Respýblıkasy Jer kodeksiniń 43-1-babyn tekserý týraly» qaýlysyn jáne konkýrs jeńimpazyn aıqyndaý ólshemsharttaryna qatysty berilgen usynymdaryn elemegen.
Іsti qaıta qaraý qorytyndysy boıynsha sot oblys ákimine kináli tulǵalardyń jaýaptylyǵy máselesin qoıý jáne ákimshilik rásimderdiń birkelkiligin taldaý jóninde jeke uıǵarym shyǵardy.
– Sot qaýlysymen Syrym aýdany ákimdigi men aýdandyq jer qatynastary bóliminiń ókiline protsessýaldyq mindetter men sot qaýlylaryn oryndamaǵany úshin árqaısysyna 20 AEK (78 640 teńgeden) aıyppul salyndy. Aıyppuldar tólendi. Sottyń jeke uıǵarymy profılaktıkalyq sharalar qabyldaý jáne kináli tulǵalardy jaýapkershilikke tartý arqyly oryndaldy. Osylaısha, talapty qanaǵattandyrýdan bas tartý týraly birinshi satydaǵy sottyń sheshimi kúshin joıyp, baıqaý qorytyndylaryn joıý jáne olardy qaıta qaraýǵa májbúrleý jolymen talapty qanaǵattandyrý týraly jańa sheshim qabyldandy. Sot qaýlysy zańdy kúshine endi, - dep habarlady vedomstvodan.
Eske sala keteıik, budan buryn BQO-da qyzmet babynda qaza tapqan polıtseıdiń otbasyna 9 mln teńge ótemaqy tólenbegenin jazǵan edik.