BQO-da Jeńis kúnine oraı 6 maıdangerge 1,5 mln teńgeden beriledi
ORAL. KAZINFORM — Batys Qazaqstan oblysynda bıyl Jeńis kúnine oraı 1 722 adamǵa 91,8 mln teńgege birjolǵy áleýmettik kómek kórsetiledi.
BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Jaqsylyq Abdolovtyń málim etkenindeı, aýdandyq jáne qalalyq máslıhattardyń sheshimderimen bekitilgen áleýmettik kómek kórsetý, onyń mólsherlerin belgileý jáne muqtaj azamattardyń jekelegen sanattarynyń tizbesin aıqyndaý qaǵıdalaryna sáıkes sonyń ishinde Ekinshi dúnıejúzilik soǵysqa qatysqan 6 maıdangerge 1,5 mln teńgeden beriledi.
Onyń sózine qaraǵanda, sondaı-aq Lenıngrad qalasyn qorshaý kezeńinde jumys istegen 1 adam 120 myń teńge alady. Sol sekildi Keńes armııasynyń erikti jaldamaly quramynda bolǵan taǵy bir ardagerge sondaı kólemde járdem beriledi.
- Jasóspirim kezinde fashıstik lagerde tutqynda bolǵan 4 adamnyń árqaısysyna 120 myń teńgeden tıedi. Qaıtys bolǵan Ekinshi dúnıejúzilik soǵys ardagerleri jáne solarǵa teńestirilgenderdiń áıelderi (101 adam), sondaı-aq 1 609 tyl eńbekkerine 50 myń teńgeden kómek kórsetiledi, - dedi J.Abdolov.
Eske sala keteıik, budan buryn Batys Qazaqstanda 24 500-den astam adamnyń jumyspen qamtylǵanyn jazǵan bolatynbyz.
