BQO-da jeńil kólik avtobýspen túıisip, eki adam kóz jumdy

ORAL. KAZINFORM — Batys Qazaqstan oblysy aýmaǵynda Aqtóbe-Oral tas jolynda adam ólimine soqtyrǵan jol-kólik apaty boldy.

BQO polıtsııa departamentiniń baspasóz qyzmetinen málim etkenindeı, oqıǵa 22 naýryz kúni shamamen saǵat 06.15-te Shyńǵyrlaý aýdany Almaz aýyly tusynda boldy.

— Júrgizýshi Opel Zafira avtokóligimen kele jatyp, joldyń qarsy betine shyǵyp ketken. Sóıtip Van Hool avtobýsymen soqtyǵysqan. Jol-kólik oqıǵasy saldarynan Opel Zafira avtokóliginiń júrgizýshisi men jolaýshysy mert boldy. Avtobýs júrgizýshisi aýrýhanaǵa jetkizildi. Qazirgi kezde qylmystyq is qozǵalyp, sotqa deıingi tergeý amaldary júrgizilýde. Oqıǵanyń mán-jaıy anyqtalý ústinde, — dep habarlady vedomstvodan.

Eske sala keteıik, budan buryn Batys Qazaqstanǵa ushqyshsyz ushatyn apparat qulaǵanyn jazǵan bolatynbyz.