BQO-da jemqorlyqqa barǵan 30 memqyzmetshi jazalaryn tartty
ORAL. QazAqparat - Memlekettik qyzmet qataryn buǵan kir keltiretinderden qalaı aryltýǵa bolady?
Tamyr-tanystyqpen qyzmet baspaldaǵymen kóteriletinderge qalaı tosqaýyl qoıýǵa bolady? Sybaılas jemqorlyq kórinisteriniń qalaı aldyn alýǵa, oǵan tózbeýshilikke jastardy qalaı tárbıeleýge bolady? Mine, osyndaı máseleler óńirlik kásipkerler palatasynda sybaılas jemqorlyqqa qarsy mádenıetti qalyptastyrý boıynsha ótken kásipkerler forýmynda talqylandy, dep habarlaıdy QazAqparat.
Qazaqstan sybaılas jemqorlyq jóninen álemde 168 eldiń ishinen 123-inshi oryndy ıelenedi. Degenmen sońǵy kezde oń ózgeris baıqalǵan (2014 jyly Qazaqstan 140-ynshy orynda edi). Sybaılas jemqorlyq kórinisterine salalyq zańnamalardyń jetildirilmeýi, memlekettik jáne korporatıvtik basqarýdyń tolyq ashyq emestigi, laýazymdy qyzmetkerlerdiń turǵyndarǵa memlekettik qyzmet kórsetýde tikeleı baılanystylyǵy, olardyń quqyqtyq mádenıetiniń tómendigi áser etýde.
Sybaılas jemqorlyqqa qarsy is-qımyl ulttyq bıýrosy BQO boıynsha departamentiniń basqarma basshysy Danııar Turǵanbaevtyń aıtýynsha, qazirgi tańda turǵyndardyń memlekettik qyzmetshilerge syılyq berýge bolmaıtyndyǵy jóninde úgit-túsinik jumystary belsendi júrgizilýde. Negizgi maqsat - mundaı tartý-taralǵynyń sol adamnyń qyzmet baspaldaǵymen ósýine kedergi keltiretinin uǵyndyrý. Oǵan qosa sybaılas jemqorlyqqa tosqaýyl qoıýdyń bir joly - jazalaý sharalary. Osyndaı qadamǵa barǵan kez kelgen adam jazasyz qalmaıdy, zań aldynda bári birdeı jaýap beredi. Mysaly, jyl basynan beri oblystyq departamentpen memlekettik organdardyń bes birdeı basshysy men olardyń orynbasarlary qylmystyq jaýapkershilikke tartyldy. Sonyń ekeýi - departament basshylary (BQO boıynsha tabıǵı monopolııalardy retteý men básekelestikti qorǵaý departamentiniń basshysy V.Razov pen BQO boıynsha tutynýshylar quqyǵyn qorǵaý departamentiniń basshysy M.Aryspaev). Jyl basynan beri barlyǵy 39 adam sybaılas jemqorlyq jasaǵany jóninde kúdikti dep tanylsa, sonyń 30-y túrli jazasyn tartty. BQO boıynsha sybaılas jemqorlyqqa qarsy is-qımyl qyzmeti anyqtaǵan qylmystar boıynsha sot úkimderimen salynǵan aıyppul kólemi 90 mln. teńgege jetti. Memlekettik qyzmetshilerdiń zańsyz aralasýynan kásipkerlerdi qorǵaý departamenttiń basym baǵyttarynyń biri bolyp tabylady. Bıyl osyndaı 8 derek belgili bolyp, 7 kásipkerdiń quqyǵy qorǵaldy. Mundaı qylmysqa barǵan 4 laýazymdy qyzmetker jaýapqa tartylyp, aıyptaý úkimderi shyǵaryldy.
Forýmǵa qatysýshylar sybaılas jemqorlyqqa qarsy mádenıetti qalyptastyrý baǵytynda óz oı-pikirlerimen bólisti, usynystaryn bildirdi. Olar memlekettik qurylymdar men qarapaıym azamattar birlesip qımyldasa ǵana mundaı sharalardyń pármendiligin arttyrýǵa bolatyndyǵyn atap kórsetti. Mysaly, Úkimet qaýlysyna sáıkes bıyl jyl basynan beri sybaılas jemqorlyqqa jatatyn quqyqbuzýshylyqty habarlaǵan jáne soǵan qarsy is-áreket jasaǵan adamdardy yntalandyrý erejesi engizildi. Sóıtip olar bir jolǵy aqshalaı syıaqy ala alady. Eń bastysy, qylmystyń qaı túrine de múldem tózbeýshilik tanytsa ǵana qoǵam alǵa basa alady.
