BQO-da jemqorlyq úshin jaýapqa tartylǵan adamdy mektep dırektorynyń orynbasary etip qoıǵan
ORAL. QazAqparat - Terekti aýdany prokýratýrasynyń aralasýymen Janar Qutqojıeva Chapaev orta mektebi dırektorynyń orynbasary qyzmetinen bosatyldy.
BQO prokýratýrasynynyń baspasóz qyzmetinen túsken málimetke qaraǵanda, Terekti aýdandyq bilim berý bóliminiń burynǵy basshysy Svetlana Shúkirovaǵa qatysty qylmystyq istiń aıasynda sybaılas jemqorlyq qylmysyn jasaǵany úshin J.Qutqojıeva qylmystyq jaýapkershilikke tartylǵan bolatyn. Soǵan qaramastan, ol Chapaev orta mektebi dırektorynyń buıryǵymen dırektordyń orynbasary qyzmetine taǵaıyndalǵan.
QR Eńbek kodeksi 139-baby 4-tarmaǵyna sáıkes buryn sybaılas jemqorlyqqa barǵan adamnyń azamattyq qyzmet atqarýyna tyıym salynǵan. Sondyqtan aýdan prokýratýrasy Chapaev orta mektebi dırektorynyń atyna narazylyq engizip, sonyń nátıjesinde J.Qutqojıeva qyzmetinen bosatyldy.
Eske sala keteıik, qaraýyndaǵylardan para alǵany úshin S.Shúkirova Oral qalalyq sotynyń 2015 jylǵy 2 qazandaǵy úkimimen QR QK 189-baby 3-bóligi 2-tarmaǵy, 366-baby 3-bóligi 4-tarmaǵy, 24-baby 3-bóligi boıynsha sottalǵan bolatyn.
