BQO-da jemqorlyq qylmysy quqyq qorǵaý qyzmetkerleri arasynda jıi kezdesip otyr
ORAL. QazAqparat - Batys Qazaqstan oblysynda jemqorlyq qylmysy quqyq qorǵaý organdary qyzmetkerleri arasynda jıi kezdesip otyr, dep habarlaıdy «QazAqparat» tilshisi.
BQO prokýratýrasynyń baspasóz qyzmetinen túsken málimetke qaraǵanda, bıylǵy alty aıda jemqorlyq qylmystary boıynsha barlyǵy 17 adam sottaldy. Sonyń ishinde 8-i nemese 47 paıyzy - quqyq qorǵaý organdarynyń qyzmetkerleri, ekeýi (11 paıyzy) - bilim, taǵy ekeýi (11 paıyzy) - ákimdik qyzmetkerleri, beseýi (29 paıyzy) basqa salalardyń úlesine tıedi. Sottalǵandardyń 8-ine bas bostandyǵynan aıyrý jazasy belgilendi. Tórteýine bas bostandyǵynan shekteý túrindegi jaza berilip, olarǵa «QR Táýelsizdiginiń 25 jyldyǵyna baılanysty raqymshylyq jasaý týraly» Zańyna sáıkes raqymshylyq jasalyp, negizgi jazadan bosatyldy. Qalǵan adamdarǵa 6,2 mln. teńge aıyppul salyndy. Qazirgi kezde aıyppul memleket paıdasyna tolyqtaı óndirildi.
Aıta keteıik, bıylǵy birinshi jartyjyldyqta 151 kúdiktige qatysty protsessýaldyq kelisim jasalyp, olar tıisti jazasyn aldy. Túrmede jazasyn óteýshilerdiń sanyn azaıtý boıynsha júrgizilgen josparly jumystyń nátıjesinde jazalaý 27,5 paıyzǵa azaıdy.
