BQO-da jelige beınejazba salǵan medıtsına qyzmetkerine tártiptik shara qoldanyldy

ORAL. KAZINFORM — Báıterek aýdany Darııan aýdandyq aýrýhanasynda túsirilgen beınejazba áleýmettik jelide tarady.

«Dárigerler qalaı bıleıdi. Narkolog» dep atalǵan beınejazbada medıtsına qyzmetkeriniń bılep turǵan sáti kórinis tapqan. Sonymen qatar taǵy bir beınejazbada dáriger emdelýshilerdiń tizimin kórsetken.

Osyǵan baılanysty Kazinform tilshisi BQO densaýlyq basqarmasyna arnaıy saýal joldady. 

Basqarmanyń málimdeýinshe, Darııan aýdandyq aýrýhanasy medıtsına qyzmetkeriniń is-áreketinde kásibı etıka men qupııalylyq talaptaryn buzýshylyq baıqalady. 

Іshki tekserý júrgizildi. Jarııalanǵan beıneúzikterde patsıentterdiń jeke derekteri anyq kórinbeıdi, sáıkestendirýge kelmeıdi. Alaıda materıaldy ornalastyrýǵa jol bermeý kerek edi.

— Medıtsına qyzmetkeri atalǵan beınejazbany sezinbeı, qandaı da bir oısyz, nasıhatsyz, abaısyzda salǵan. Ol — jalpy tájirıbedegi jas dáriger, eńbek jolyn jańa bastaǵan maman, jumysqa jaýapkershilikpen qaraıdy, emdelýshilerden alǵys alǵan. Buryn ákimshilik jaýapkershilikke tartylmaǵan. Aýrýhana ákimshiligimen medıtsına qyzmetkerine eskertý túrinde tártiptik shara qoldanyldy. Qupııalylyq pen kásibı etıkany saqtaý boıynsha qosymsha túsinik jumystary júrgizildi. Aýrýhana ákimshiligi osy másele boıynsha baqylaýdy kúsheıtti, — delingen resmı jaýapta.

Eske sala keteıik, budan buryn BQO-da densaýlyq saqtaý salasynda 180 maman jetispeıtinin jazǵan edik.