BQO-da jelden 3 mekteptiń shatyry ushyp, elektr baǵandary qulady
ORAL. QazAqparat – Batys Qazaqstan oblysynda daýyldy jel mektepter men turǵyn úılerdiń shatyryn ushyryp, elektr baǵandaryn qulatty. QazAqparat bul týraly BQO Tótenshe jaǵdaılar departamentiniń baspasóz qyzmetine silteme jasap habarlaıdy.
28 maýsym kúni saǵat 17.15-te Shyńǵyrlaý aýdany Aqbulaq aýyldyq okrýgi Tasmola aýylynda ekpini sekýndyna 16 metrge deıin jetken jel orta mekteptiń 40 sharshy metr shatyryn julyp áketken. Eki qabatty ǵımarattyń jalpy aýdany – 500 sharshy metr. Sonymen qatar 9 jeke úıdiń shatyryna ishinara zaqym keldi.
Al 29 maýsym kúni saǵat 15.50-de Aqjaıyq aýdany Bazartóbe aýylynda orta mekteptiń 180 sharshy metr shatyry sypyrylyp tústi. 1976 jyly salynǵan qos qabatty ǵımarattyń jalpy aýdany – 1100 sharshy metr. Sondaı-aq Bazartóbe aýyldyq okrýgi ákimdigi ǵımaratynyń (6 sharshy metr) jáne 12 jeke úıdiń (30 sharshy metr) shatyry zaqymdaldy.
29 maýsym kúni saǵat 17.12-de Syrym aýdanynda 16 elektr baǵany qulap, sonyń saldarynan Qosoba (126 abonent) men Jyraqudyq (108 abonent) aýyldary jaryqsyz qaldy. Qosobada 5, Jyraqudyqta 10 jeke úıdiń tóbeleri búlindi.
Saǵat 13.00-de Tasqala aýdany Oıan aýylynda orta mekteptiń 70 sharshy metr shatyry julyndy. 1974 jyly salynǵan qos qabatty ǵımarattyń jalpy aýdany – 2195 sharshy metr.
Qazirgi tańda keltirilgen shyǵyn anyqtalý ústinde.
Eske sala keteıik, Batys Qazaqstanda aýa raıyna baılanysty eskertý jarııalanǵan bolatyn.
