Oralda jel elektr stantsııasynyń qurylysy bastalady
ORAL.KAZINFORM - Aımaqta alǵash ret jel elektr stantsııasy salynady. Mańyzdy joba Memleket basshysy Qasym-Jomart Toqaevtyń jańartylatyn energııa kózderiniń úlesin arttyrý jónindegi tapsyrmasyna sáıkes júzege asyrylady. Búgin qýaty 50 MVt bolatyn energetıkalyq nysannyń qurylys alańynda ýaqyt kapsýlasyn salý rásimi ótti. Oǵan aımaq basshysy Narıman Tóreǵalıev, qytaılyq ınvestor qatysty.
Jel elektr stantsııasyn salý úshin 140 ga jer telimi berilgen. Aýktsıon nátıjesinde mańyzdy jobany qolǵa alǵan «GREEN ENERGY INDUSTRIAL COMPANY CENTRAL ASIA» JShS dırektory Gao Venkenyń aıtýynsha, ınvestıtsııa kólemi – 21 mlrd teńge. 8 aı buryn aýmaqta anemometr ornatylǵan. Meteorologııalyq qurylǵynyń kómegimen anyqtalǵan jeldiń jyldamdyǵy stantsııanyń qalypty jumys isteýine múmkindik beredi.
BQO ákiminiń baspasóz qyzmeti málimetinshe, joba óńir ekonomıkasynyń damýyna serpin berip, ınvestıtsııalyq tartymdylyqty arttyrady. Jańa jumys oryndary ashylady. Qurylys osy aıda bastalyp, kelesi jyly tolyq aıaqtalady. Kepildik merzimi – 20 jyl. 5 adam turaqty, 50 adam maýsymdyq jumyspen qamtylady.
Oblys ákimi Narıman Tóreǵalıev energetıkalyq qaýipsizdikti qamtamasyz etý sharalary júıeli jalǵasatynyn jetkizdi. Jýyrda Jánibek aýdanynyń Ónege aýylynda gıbrıdti elektr stantsııasynyń qurylysy bastalady.
Joba nátıjesinde óńir ımportqa táýeldilikten arylady. Keıingi 3 jyldyń ózinde oblysty energııamen jabdyqtaýǵa 44 mlrd teńgeden astam qarjy baǵyttalsa, bıyl 20 mlrd teńge bólindi. 2029 jylǵa qaraı elektr jelileriniń tozý deńgeıin 11 paıyzǵa tómendetý josparlanyp otyr.
