BQO-da jel elektr stansasy salynbaq
ORAL. QazAqparat - Bórli aýdanynda jalpy qýaty 50 MVt-ǵa deıin jel elektr stansasyn salý kózdelýde, dep habarlaıdy «QazAqparat» tilshisi.
Jobany qolǵa alǵan «Jel energııasy» JShS dırektory Murat Qanybekovtiń aıtýynsha, osy maqsatqa Aqsaı qalasynyń soltústik bóliginen 100 gektar jer bólindi. Onda elý generator turǵyzý kózdelýde. Jobany júzege asyrý úshin bastapqyda elý adam jumyspen qamtylmaq. Keıin qurylys-montaj jumystary júrgen kezde 120 adamǵa jetpek. Jalpy quny 119,5 mln eýrony (39,9 mlrd teńge) quraıtyn jobanyń bas merdigeri - osy jumysta tájirıbesi bar reseılik «ACTIVITY» kompanııasy. Qurylysty aldaǵy jyly bastap, 2020 jyly aıaqtaý josparlanyp otyr. Joba on jylda ózin-ózi aqtamaqshy.
Aýdan ákiminiń orynbasary Qaırat Ótegenovtiń sózine qaraǵanda, jasyl ekonomıka baǵytyndaǵy bul joba ekologııa jaǵynan da tıimdi. Aýdanǵa qomaqty qarjy kelýmen birge jergilikti turǵyndar úshin jumys oryndary ashylady.
Jalpy, Bórli aýdany jaz kezinde 12, qysta 15 MVt elektr qýatyn tutynady. Jańa stansa iske qosylsa, onyń qýaty kórshiles aýdandardy da qamtı alady.
Bórli aýdany ákimdigi men «Jel energııasy» JShS arasynda ózara yntymaqtastyq jónindegi memorandýmǵa qol qoıylyp, jumystar bastalyp ketti.
