BQO-da jeke turǵyn úı qurylysy úshin 764 jer telimi berildi

ORAL. QazAqparat – Batys Qazaqstan oblysynda jeke turǵyn úı qurylysy úshin 764 jer telimi berildi, dep habarlaıdy QazAqparat tilshisi.

BQO jer qatynastary basqarmasynyń basshysy Murat Ómirálıev málim etkendeı, 764 ýchaskeniń 511-i Oral qalasynda, qalǵany Aqjaıyq, Bórli, Jańaqala, Qaratóbe jáne Shyńǵyrlaý aýdandarynda jer kezeginde turǵandarǵa tabystaldy.

Onyń sózine qaraǵanda, sonymen qatar ınjenerlik jelilermen qamtamasyz etilgen 1 780 jer telimin (sonyń 389-y Oralda) berý josparlanýda.

«Oral qalasyna toqtalar bolsam, Krýgloozernyı kenti aýmaǵynda jeke turǵyn úı qurylysy úshin jer telimin alýǵa 2002, 2003, 2004 jyldyń 1 jáne 2-toqsanynda (7 maýsymǵa deıin) tirkelgen 900 turǵynnan ótinishterin qabyldaý júrgizildi. Qazirgi tańda sonyń 617-sinen ótinish kelip túsip, 511-ine jer ýchaskesi berildi. Qalǵan 283 azamattyń tizimi Oral qalasy ákimdiginiń resmı saıtynda jarııalandy. Olarǵa qala ákimdigine kelip, jer telimin alýǵa ótinish berý qajettigi jóninde habarlamalar joldanýda», - dedi M.Ómirálıev.

Kúni búgin oblys boıynsha jeke turǵyn úı qurylysy úshin 161 810 adam jer kezeginde tursa, sonyń 108 487-si Oral qalasynyń úlesine tıedi.

Bir aıta ketetin jaıt, ashyqtyqty qamtamasyz etý maqsatynda bıyl úı qurylysy úshin kezekke qoıý protsesi avtomattandyryldy.

Eske sala keteıik, budan buryn Batys Qazaqstan oblysynda 186 myń gektar jerdiń sharýalarǵa berilgenin jazǵan bolatynbyz.