BQO-da jazǵy kafeler, barlyq dúkender ashylady
ORAL. QazAqparat – Batys Qazaqstan oblysynda 18 mamyrdan bastap jazǵy kafeler, barlyq dúkender ashylady, dep habarlaıdy QazAqparat tilshisi.
BQO bas memlekettik sanıtarlyq dárigeriniń qaýlysyna sáıkes 18 mamyrdan bastap jumys jasaıtyn nysandar belgili boldy.
Atap aıtqanda, 30 orynǵa deıingi ashyq úlgidegi jazǵy kafeler saǵat 11.00-den 20.00-ge deıin, aýdany 2 myń sharshy metrge deıingi azyq-túliktik emes dúkender (barlyq baǵyttar) saǵat 10.00-den 18.00-ge deıin, azyq-túliktik emes bazarlar saǵat 09.00-den 16.00-ge deıin, týrıstik kompanııalar saǵat 10.00-den 18.00-ge deıin jumys isteıdi.
Sondaı-aq barlyq sanıtarlyq-epıdemıologııalyq talaptardy, epıdemııaǵa qarsy is-sharalardy saqtaı otyryp, bilim berý ortalyqtary, úıirmeler, balalar damý ortalyqtary (adam sany 10-nan aspaýy tıis) saǵat 09.00-den 16.00-ge deıin ashylady.
Sport nysandary men tennıs kortynda tek ashyq alańda sportshylar bola alady. Tek kórermendersiz, 30 adamnan aspaýy tıis. Osy talap mádenıet nysandarynda da saqtalady.
Hımııalyq tazalaý oryndary saǵat 10.00-den 18.00-ge deıin jumys isteıdi.
Al 20 mamyrdan bastap mektepke deıingi balalar uıymdarynda jas erekshelikterine qaraı bir kezekshi toptan ashylady. Munda da sanıtarlyq-epıdemıologııalyq talaptar qatań saqtalýy tıis. Medıtsına qyzmetkeri balabaqshanyń barlyq qyzmetkerleri men balalardy tańerteń súzgiden ótkizedi. Ýchaskelik pedıatrdan densaýlyq jaǵdaıy týraly anyqtamalary bar balalar qabyldanady. Jiti respıratorlyq juqpalar, basqa da juqpaly aýrý belgileri bar qyzmetkerler men balalar jiberilmeıdi.
Eske sala keteıik, budan buryn BQO-da Reseıden kelgen túrkistandyq stýdentten koronavırýs tabylǵanyn jazǵan bolatynbyz.
