BQO-da jazataıym oqıǵalar saldarynan 11 adam zardap shekti
ORAL. KAZINFORM — Batys Qazaqstan oblysynda jyl basynan beri adamdardyń óndiriste jaraqattanýynyń óskeni baıqalady.
BQO boıynsha eńbek ınspektsııasy departamentiniń basshysy Asylulan Dosjanovtyń óńirlik kommýnıkatsııalar qyzmeti alańynda ótken brıfıngte málim etkenindeı, bıyl arnaıy tergep-tekserý qorytyndylary boıynsha 10 jazataıym oqıǵa (sonyń ishinde ekeýi — toptyq) tirkeldi. Bul — ótken jyldyń osy kezeńimen birdeı.
Degenmen jazataıym oqıǵalar saldarynan 11 adam zardap shekti, bul ótken jylǵydan (10) 9 paıyzǵa artyq.
Asylulan Tursynulynyń sózine qaraǵanda, sonyń ishinde 7 adam aýyr jaraqat alǵan, bul kórsetkish 2025 jylǵydan 42 paıyzǵa ósip otyr. Sondaı-aq 4 adam (ekeýi toptyq oqıǵalarda) qaza tapqan, bul ótken jylǵydan (2) 50 paıyzǵa kóp.
— Ólimmen aıaqtalǵan jazataıym oqıǵalar jol apaty, aýa raıyna baılanysty úsik shalý, sondaı-aq gaz ıisinen ýlaný saldarynan oryn alǵan. Júrgizilgen taldaý kórsetkendeı, mundaı oqıǵalardyń kópshiligi jumys berýshiler tarapynan eńbek zańnamasynyń talaptary tıisti deńgeıde saqtalmaýy saldarynan bolǵan. Sebebi olardyń keıbiri qaýipsizdik tehnıkasy men eńbekti qorǵaýdyń negizgi talaptaryn elemeıdi, — dedi A.Dosjanov.
Onyń málimdeýinshe, tergep-tekserý qorytyndylary boıynsha eńbekti qorǵaý jaǵdaıynyń qanaǵattanarlyqsyz bolýynyń negizgi sebepteri anyqtaldy. Atap aıtqanda, kásiporyndarda eńbekti qorǵaý jáne eńbek gıgıenasy salasynda naqty saıasat bolmaǵan. Jumyskerler men jumys berýshiler arasyndaǵy ózara is-qımyldyń tıisti uıymdastyrýshylyq qurylymy men tetigi, eńbekti qorǵaý is-sharalaryn basqarý júıesi joq. Oǵan qosa eńbekti qorǵaý mádenıeti tómen deńgeıde. Munyń bárin joıýǵa bolady.
— Qoǵamnyń nazaryn eńbekti qorǵaý salasyndaǵy máselelerge — óndiristik jaraqattar, kásiptik aýrýlar men ólim jaǵdaılaryna aýdarý maqsatynda Halyqaralyq eńbek uıymy jyl saıyn 28 sáýirde Dúnıejúzilik eńbekti qorǵaý kúnin atap ótedi. «Eńbekti qorǵaý» — qyzmetkerlerdiń eńbek qyzmeti barysynda ómirin, densaýlyǵyn jáne eńbekke qabilettiligin saqtaýǵa baǵyttalǵan júıe. Osyǵan oraı sáýir aıy eńbekti qorǵaý aılyǵy bolyp jarııalandy. Óndiristik jaraqattaný deńgeıin tómendetý — búgingi kúnniń basty mindetteriniń biri. Osy baǵytta eńbek ınspektsııasy tarapynan barlyq qajetti sharalar qabyldanýda, — dep qosty A.Dosjanov.
Eske sala keteıik, budan buryn BQO-da eńbek ınspektorlarynyń tekserýi nátıjesinde 235 zańbuzýshylyq anyqtalǵanyn jazǵan bolatynbyz.
