BQO-da jazasyn ótep jatqan 151 adamǵa raqymshylyq jasalady
ORAL. QazAqparat - «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» Zańyna sáıkes BQO boıynsha bas bostandyǵynan aıyrý oryndarynda jazasyn ótep jatqan 151, sondaı-aq probatsııa qyzmeti esebinde turǵan 611 adamǵa raqymshylyq jasalady, dep habarlaıdy «QazAqparat» HAA tilshisi.
BQO boıynsha qylmystyq-atqarý júıesi departamentiniń bas mamany mindetin atqarýshy, ádilet maıory Tımýr Dúısálıevtiń aıtýynsha, sonyń ishinde 4 adam ǵana túzetý mekemesinen bostandyqqa shyǵady. 39 adamǵa qatysty jazasynyń ótelmegen bóligi neǵurlym jeńil jaza túrine aýystyrylsa, úkimde kórsetilgen basqa da talaptary tolyqtaı ótelgen 108 sottalýshynyń jazasy qysqartylady.
Eske sala keteıik, atalmysh Zań izgilik aktisi ári memleket tarapynan meıirimdilik pen senim bildirýdiń kórinisi bolyp tabylady. Zańǵa sáıkes áleýmettik jaǵynan álsiz topqa jatatyndar, sonyń ishinde kámeletke tolmaǵandar, júkti áıelder, kámeletke tolmaǵan nemese múgedek balasy bar áıelder, múgedekter, qart adamdar, sondaı-aq aýyr emes qylmystyq quqyqbuzýshylyq jasaǵandar qylmystyq jazadan bosatylady. Jazanyń ótelmegen bóligin aıyppulmen nemese bostandyǵyn shekteýmen almastyrý, sonymen qatar qysqartý da kózdelgen.
