BQO-da jaz bastalmaı jatyp 8 adam sýǵa ketti
ORAL. QazAqparat - Batys Qazaqstan oblysynda bıyldyń ózinde 8 adam sýǵa ketti, dep habarlaıdy QazAqparat tilshisi.
BQO TJ departamentiniń bastyǵy, general-maıor Jasulan Jumashevtiń málim etkenindeı, sonyń ekeýi jasóspirimder bolyp otyr.
Ótken jyly osy kezge deıin 9 adam sýǵa ketse, sonyń ekeýi bala bolǵan.
Jalpy, sońǵy on jylda oblys aýmaǵynda 262 adam sýǵa ketken, sonyń 72-si - balalar.
J.Jumashevtiń aıtýynsha, árbir sý aıdynyn qorshaý nemese sýǵa túsken ár adamǵa qutqarýshyny bekitý múmkin emes.
Bul máseleni sheshýdiń birden-bir joly - qoǵamda úgit-nasıhat jumystaryn júrgizý jáne adamdardy, sonyń ishinde balalardy júzýge úıretý.
«Oblys ákimdiginiń qaýlysymen sý nysandarynda adamdardyń jappaı demalýyna arnalǵan 69 oryn anyqtalsa, kúni búgin 5 jaǵajaı ǵana tekserýge ótinim berdi. Jaǵajaılardy jaýapty tulǵalarǵa bekitý jumysy jalǵasýda», dedi Jasulan Jumashev.
Sonymen qatar bıyl jyl basynan beri oblys aýmaǵynda 2 orman órti (ótken jyly osy merzimde - 2), 93 janý oqıǵasy (92) tirkelip otyr.
Qazirgi ýaqytta órttiń aldyn alý baǵytynda departament jergilikti polıtsııa qyzmetimen birlesken reıdtik sharalar ótkizýde. Sonyń nátıjesinde 85 adamǵa QR Ákimshilik quqyqbuzýshylyq kodeksi 336-babyna sáıkes hattama toltyrylyp, ekeýine 367-bap boıynsha 24050 teńge kóleminde aıyppul salyndy.
