BQO-da jaıylymdyq jer sot sheshimimen aýyl turǵyndaryna qaıtaryldy
ORAL. KAZINFORM — Batys Qazaqstan oblysy Báıterek aýdany Peremetnyı aýyldyq okrýgine qarasty Bolashaq aýylyndaǵy jer daýyna baılanysty sot sheshimi shyqty.
Atalmysh aýyl turǵyny Nurmuhanbet Daýlıevtiń málim etkenindeı, eldi mekennen 4 shaqyrymdaı jerdegi kóldiń jaǵasynda uzynaboıyna ornalasqan 217 gektar jaıylymdyq jer 2017 jyly jeke adamǵa jalǵa berilgen. Ol kisi 2022 jyly jerdi «Agrarlyq qyzmeti» JShS-ǵa satyp jibergen.
— Jerdiń jekege berilip ketkenin estigenimizben, ótken jylǵa deıin qysym kórgenimiz joq. Ótken jyly bul sharýa qojalyǵynyń jeri dep malymyzdy jaıdyrmaǵandyqtan, ádilet izdedik. Budan basqa mal jaıylatyn jer joq. Aýyl jáne aýdan ákimdikterine ótinish jasaǵanymyzben, odan nátıje bolmady. Tek Oral qalasyndaǵy zańger Baýyrjan Ahmetjanǵa jolyqqannan keıin isimiz ońǵa basty, — deıdi N.Daýlıev.
BQO qoǵamdyq keńesiniń múshesi Baýyrjan Ahmetjan aýyl turǵyndarynyń 2024 jyly ózine mal jaıylymynyń jekege negizsiz berilgenin aıtyp, aryzben júgingenin rastady. Munyń sebebi — kólemi 217 ga jer ýchaskesi aýyldyń jerinde jatyr. Jer shekarasy úlken kólge tıip tur, sonyń kesirinen maldy sý ishýge de ótkizbeıdi.
Onyń naqtylaýynsha, Dosym Karımov 2017 jyly atalmysh jerdi 10 jylǵa jalǵa alǵan. Sodan keıin 2022 jyly «Agrarlyq qyzmeti» JShS-ǵa satyp jibergen.
— Báıterek aýdanynyń prokýrory Almas Meńlibaev pen BQO jer resýrstaryn basqarý departamentiniń basshysy Berik Esenǵalıev birige otyryp, aryzdy tekserip, zań buzylǵandyǵyn anyqtady. Jer kodeksiniń 26-baby men «Jaıylymdar týraly» Zańynyń 13-babyna sáıkes halyqtyń qajetine paıdalanylatyn jaıylymdar jeke menshikke berilmeıdi. Tek aýyldyń malyn jaıý úshin halyq muqtajyna ǵana paıdalanylady. Ótken jyly atalmysh seriktestik qazaqtyń aqbas tuqymdy sıyryn ósiremiz dep, jaıylymnan qora men úı de salǵan. Departament zańsyz sharttardy buzý týraly sotqa talap aryz berdi. Іsti qaraǵan BQO mamandandyrylǵan aýdanaralyq ekonomıkalyq sotynyń sýdıasy Asılıa Bıssalıeva ádil sheshim shyǵardy, — deıdi B.Ahmetjan.
BQO mamandandyrylǵan aýdanaralyq ekonomıkalyq sotynyń bıylǵy 22 shildedegi sheshimimen Báıterek aýdandyq jer qatynastary bólimi men Dosym Karımovtyń arasyndaǵy 2017 jylǵy 5 maýsymdaǵy, sondaı-aq atalmysh bólim men «Agrarlyq qyzmeti» JShS-men 2022 jylǵy 19 qazandaǵy jer ýchaskesin jalǵa alý tıptik kelisimsharttary jaramsyz dep tanyldy. D. Karımovtyń «Agrarlyq qyzmeti» JShS-men 2022 jylǵy 18 qazandaǵy satyp alý-satý kelisimsharty da buzyldy.
Sot sheshimi zańdy kúshine engen joq.
Eske sala keteıik, budan buryn Batys Qazaqstanda karerler zańdy paıdalanylyp otyr ma degen saýalǵa jaýap izdep kórgenbiz.