BQO-da Jaıyq ózeniniń jaǵalaýyn bekitý jumystary júrgizilip jatyr
ORAL. KAZINFORM – Jaıyq ózeniniń Oral qalasyna qarasty Krýgloozernyı kenti tusyndaǵy jaǵalaýyn bekitý jumystary jalǵasady.
BQO tabıǵı resýrstar jáne tabıǵat paıdalanýdy retteý basqarmasynyń basshysy Marat Moldashevtiń málim etkenindeı, atalǵan ýchaskeniń tolyǵymen shaıylyp, ózen arnasynyń ózgerýine jol bermeý maqsatynda qolǵa alynǵan jobany «Pavlodar ózen porty» AQ júzege asyryp jatyr.
Marat Tóleǵalıulynyń sózine qaraǵanda, jobanyń jalpy quny – 7,4 mlrd teńge. 2024-2025 jyldary 4,7 mlrd teńge bólinse, bıyl respýblıkalyq bıýdjetten 2,677 mlrd teńge qaralyp otyr.
- Taǵy bir mańyzdy joba – Jaıyq-Shalqar kanaly rekonstrýktsııalanyp jatyr. Munyń quny – 4,7 mlrd teńge. 2024-2025 jyldary bul maqsatqa 1,976 mlrd teńge jumsalǵan edi. Bıyl respýblıkalyq bıýdjet esebinen 1,587 mlrd teńge qarastyryldy, - dedi M.Moldashev.
Onyń aıtýynsha, Batys Qazaqstan oblysy aýmaǵynda 50 gıdrotehnıkalyq qurylys bolsa, sonyń ishinde 39 sý qoımasy (14-i «Qazsýshar» Batys Qazaqstan fılıaly, 25-i jergilikti atqarýshy jáne kommýnaldyq menshikte), 4 gıdrotorap pen 1 bóget («Qazsýshar»), 6 toǵan (úsheýi – kommýnaldyq, jartysy – jeke) bar.
Kommýnaldyq menshiktegi 28 gıdrotehnıkalyq 20-sy qanaǵattanǵysyz kúıde qalyp otyr.
Qazirgi ýaqytta 11 nysan boıynsha qaıta jóndeý jumystaryn júrgizý josparlanyp otyr. 2025 jyly Aqjaıyq aýdanynda Solıanka ózenindegi Aqjaıyq sý qoımasyn qaıta jańǵyrtýǵa jobalyq-smetalyq qujattama daıyndaldy. Sondaı-aq Bókeı ordasy aýdanynda Muratsaı sý qoımasynyń JSQ-syna saraptama jasalady.
- Terekti aýdanynda 9 sý qoımasy boıynsha 431,722 mln teńgege JSQ ázirlengen jáne daıyndalyp jatyr. Jobalaýshylar – «Ýralvodproekt» JShS jáne «Teka proekt» JShS. Oǵan qosa bıyl taǵy 8 nysandy qaıta jańǵyrtýǵa JSQ daıyndaý kózdelip otyr. Sonymen qatar 2025 jyly 9 gıdrotehnıkalyq qurylymdy kópfaktorly zertteý úshin 102,270 mln teńge jumsaldy. Bıyl taǵy alty qurylymdy tekserýge 53,014 mln teńge ketpek, - dep qosty M.Moldashev.
Eske sala keteıik, budan buryn Batys Qazaqstan oblysyndaǵy sý qoımalarynyń jaǵdaıy qalaı ekendigi týraly jazǵan bolatynbyz.
Sondaı-aq BQO-da 90 eldi mekende sý qorǵaý aýmaqtarynyń shekarasy belgilenedi.
