BQO-da Jaıyq ózeninen Jaıyq-Kóshim júıesine sekýndyna 116 tekshe metr sý jiberilip jatyr
ORAL. KAZINFORM — Batys Qazaqstan oblysynda «Qazsýshar» mekemesiniń sý qoımalaryna 446,8 mln tekshe metr sý jınaqtalyp, 88,1 paıyzǵa toltyryldy.
«Qazsýshar» RMK Batys Qazaqstan fılıalynyń basshysy Raýan Husaıynovtyń málim etkenindeı, Kaztalov pen Jańaqala aýdandary aýmaǵymen aǵatyn Qaraózen men Saryózenge 428,0 mln tekshe metr sý alyndy. Bul aǵyn sý lımandar men tabıǵı shabyndyqtarǵa, sondaı-aq sý qoımalary men kólderdi toltyrýǵa baǵyttaldy.
Raýan Erlanulynyń sózine qaraǵanda, Jaıyq ózeninen Jaıyq-Kóshim júıesine sekýndyna 116 tekshe metr sý túsip jatyr. Munda jyl basynan beri atalǵan júıege 273,0 mln tekshe metr sý quıyldy. Qazirgi tańda sý qoımalaryna qosa, kólder men kóltabandarǵa, tabıǵı shabyndyqtarǵa sý jiberilip jatyr.
«Oral qalasyndaǵy Shaǵan sý qoımasynda sýdyń deńgeıi Baltyq júıesi boıynsha 30,91 metrdi kórsetti, bir táýlikte 7 santımetrge joǵarylady. Sý tasqyny bastalǵannan beri ózen deńgeıi jalpy 5,4 metrge kóterildi. Kúni búginge deıin Shaǵan jáne Derkól ózenderinde ornalasqan sý beketterinen 390,0 tekshe metr aǵyn sý tústi. Paıdalaný erejesine sáıkes Shaǵan sý qoımasynyń sý tastaǵysh ımaraty 2023 jyldyń kúzinen bastap tolyq ashyq. Fılıaldyń sý sharýashylyǵy nysandarynda jaǵdaı turaqty», - dedi R.Husaıynov.
Tómengi Edil basseındik sý basqarmasy Orynbor oblysy boıynsha sý resýrstary bóliminiń bastyǵy Sergeı Rıdeldiń Raýan Husaıynovtyń atyna jibergen resmı hatyna sáıkes Jaıyq ózeniniń deńgeıi 27 sáýir kúni saǵat 08.00-de Orynbor qalasy tusynda 855 (qaýipti shegi – 760 sm), Elek aýylynda 884 (850 sm) santımetrdi kórsetti.
Orynbor oblysyndaǵy Irekli sý qoımasynan Jaıyqqa 22 sáýirden beri sekýndyna 192 tekshe metr sý jiberilip jatyr.
Eske sala keteıik, budan buryn Batys Qazaqstanda oblystyq jol qaq aıyrylyp, sý shaıyp ketkenin jazǵan bolatynbyz.
Jaıyq ózenindegi sý deńgeıi Taıpaq aýyly tusynda 580 santımetrden asty.